23 Sept 2024: Vawiin chawhma khan Lunglei District Level Advisory Committee on Safe Food & Healthy Diets chu Additional Deputy Commissioner Pu James Miahlung kaihhruaiin DC Conference Hall-ah an ṭhukhawm.
Pu James Miahlung chuan hriselna leh thianghlimna kawnga hmasawn turin ei leh inah fimkhur a ngaih thu sawiin, hemi kawngah hian hmalakna ṭha tha tak neih a ṭul hle a ni, a ti a. District Level Advisory Committee member-te chu Lunglei District-ah ei tur hrisel leh thianghlim chauh zawrh leh ei anih theih nana hma lak dan turah an ngaihtuahna seng turin a sawm a ni.
He ṭhut khawmah hian ei leh in hrisel leh thianghlimna kawnga hmasawn theihna tur ruahmanna hrang hrang sawi ho a ni a. October 2024 chawlhkar khatnaah tehfung hrang hrang hmangin ei leh in siamna hmunte endik ni se tih niin, October 2024 chawlhkar hnihna chhungin ei leh in siamtu hotel, restaurant, bakery leh catering neitute tan ei in hrisel leh thianghlim siam leh zawrh chungchang inzirtirna, sensitisation workshop buatsaih tum ni se, tih a ni a. Sawrkar office canteen-te pawh faina, hriselna leh thianghlimna ngai pawimawh tura hriattir turin head of office-te hnenah ngenna pek ni se, tih a ni a. LMC huam chhunga bakery leh home made food siam ṭhinte sawrkara la inziak lut lote chu inziak lut vek turin local council kal tlanga hriattirna chhuah turin hma lak ni se, tih a ni bawk.
Heng ruahmannate hi a thawh khat nan LMC area chhunga kalpui tura tih niin, a thawh hnihnaah Lunglei District chhunga khaw kar kawnga hotel leh restaurant siamte endik leh tum a ni. Vawiin ṭhut khawmah hian sawrkar official-te bakah hotel leh bakery neitu ai awhte an tel a ni.
