24 Nov 2023: Mizoram State Assembly inthlanpui vuakveta Election Duty tura Mizorama rawn kal 9 Assam Police Bn mi Constable Sabin Nath (42) chu tun thla ni 5 atang khan chin hriat lohvin a bo a, tun thlengin hmuh a la ni lo.
Constable Sabin Nath hi Govt. Middle School-11, Ngopa, Saitual District atangin uniform ha chunga a chhuak chu tun thlengin a chin hriat lohvin a bo a. Ngawrh takin Police-te leh NGO hrang hrangte bakah uisa thiamte’n zawn hna an thawk nachungin tun thlengin hmuh a la ni ta lo a ni.
He sipai chin hriat loha bo ta chungchang ngaihven hian nimin khan Assam Police atangin Pu Akhilesh Kumar Singh, IGP (Training & Armed Police) & Communication chuan a bona hmun Ngopa a tlawh a. S.P Saitual Pu Pukhraj Kamal leh Addl. S.P Saitual Pu F Jalbiakzauva ten a hmunah an tawiawm a ni.
Pu Akhilesh Kumar Singh hian Ngopa khawtlang hruaitute kawmin, an sipai bo zawnna-a hma an lo lak tawhna te fakawm a tih thu a sawi bakah theih tawp chhuaha mibo zawn hna lo thawk zel turin a sawm a. Mizoram Police-ten uisathiam (Canine Squad) hmanga an lo zawnnaah pawh lawmthu a sawi bawk.
Constable Sabin Nath hi zawn hmuh ngei a nih theih nan Saitual S.P Pu Pukhraj Kamal chuan a awmna chin hria apiang hnenah lawmman atan Rs 20,000/- pek a tiam a ni. (AIR Aizawl)
