11 Oct 2023: Nimin chawhnu khan Lunglei Municipal Council (LMC) Chairman Office Chamber-ah LMC Executive Council te leh P&E Dept aiawhte’n meeting an nei. He meeting hi LMC Chairman Pu Lalzuithanga’n kaihruaiin LMC lam aiawhin Executive Council te leh Officer-te an tel kim a; P&E lam aiawhin SE Er Laltlanthanga a tel bawk a ni.
Nimin meeting-ah hian Lunglei khawpui chhunga Electric ban-a cable hrui inzam hnawk tam lutuk chungchang sawiho a ni a. Khawpui tihmelmawilotu pakhat a nih avangin LMC hotute chuan sengfel dan leh phuar khawm dan ngaihtuah thuai a tul thu an sawi. Hemi chungchangah hian P&E SE Pu Tlanthanga chuan an department EE-te nen a senghawi hna thawh dan tur chungchang sawiho a tul thu te leh LMC-te leh DC lam-te nena thawhho a tul dawn thu a sawi.
LMC hotute chuan Lunglei khawpui chhunga Cable TV operator-te leh Internet Service Provider-te a rang thei ang bera kohkhawm an tum thu leh Cable neitu neilote chu senghawi a tul tur thu an sawi nghal bawk a ni.
