Engineering College Pukpui hmalakna kal mek; MZU Southern Campus-ah erawh harsatna a awm
03 July 2024: Vawiin khan MZP Hqrs Lunglei chuan Higher & Technical Education and School Education Minister Dr. Vanlalthlana chu HPC Office-ah hmuin zirna thil pawimawhte an thlen.
Education Minister chuan MZP Hqrs Lungleiin zirtirtu indaihlohna leh sawn chhuah aiawh dah loh an thlente chu a rang lama dah an nih tur thuin a lo chhang a, Tlabung Higher Secondary School Chemistry Lecturer chungchang bik chu tunah advertisement tih chhuah turin hmalak mek anih thu leh hnawh khah ngei an tum thu a sawi bawk a ni.
MZU Southern Campus chu Central Sawrkarin phalna pe mahse State Sawrkarin a senso engkim a tum vek angaih avangin tun dinhmunah chuan tih theih anih rih loh thu Education Minister chuan a sawi.
Engineering College chu hmalakna kal mek anih thu leh Central Sawrkar pawhin a ngai pawimawh em em a ni a ti a. PMJVK hnuaiah a panna kawng, electric leh tui bakah a hmun chei thatna dil mêk niin PMJVK priority list-ah a awm tih thu a sawi a, heng dilna thlen mekte hi hmuh anih hnuah leh State Sawrkarin a tih tur ang ang te a tih hnuah Engineering College chu bul tan mai theih anih thu a sawi a ni.
MZP Hqrs Lunglei chuan a hmalama thuneitute hnena an lo thlen tawh Gov’t High School Lungsen leh Gov’t Lungrang M/S zirtirtu indaihlohna chungchang pawh Education Minister chuan hmalak anih tawh thu sawiin zirlaite harsatna sukiang turin rang taka zirtirtu dah an nih tur thu a sawi a ni.
Zirlaite leh zirna ngai pawimawha hma a lakna kawngah Education Minister chungah MZP Hqrs Lunglei chuan lawmthu a sawi a ni.
Hetih lai hian MZP Hqrs Lunglei chuan Lunglei Town area huam chhunga school-te tlawh kualin an harsatna leh hmalakpui an ngaihnate a enfiah zel dawn tih an sawi bawk.
