Esther Hnamte lawmpui nan Scooter pe

21 Jan 2026: High Powered Committee (HPC) Lunglei Vice Chairman Pu V.Malsawmtluanga chuan vawiin khan HPC Conference Hall-ah Estheri Hnamte, Pradhan Mantri Bal Purasjar Award 2025 dawngtu chu lawmpuina hun hmanpuiin ama mimal sumin Scooter a pe.

Lawmpuina hun Pu Lalthlamuana P/S to Vice Chairman HPC(L) kaihhruaiah hian Pu V. Malsawmtluanga MLA chuan mahni line  a hlawhtlingte hi mi ropui an ni a, ram leh hnam tan pawh chhawr nahawm an ni thin tih sawiin, Estheri Hnamte hlawhtlinna atan hian a nu leh pa te thawhrimna bakah music leh video siam saktu zawng zawngte vawiinah hian ka chawimawiin ka fak tel duh a ni a ti. Hei bakah hian amah Support-tu zawng zawngte a fak takzet tih a sawi.

HPC hian zirna, infiamna leh mahni kutkawiha mihlawhtling leh hma la thate puiin sum leh pai an lo pe chhuak tawh thin a ti a; a hranpain sum (budget) a awm thin lo tih erawh sawiin; tuntuma Estheri naupang chawimawina Award dawngtu tana Scooter pawh hi ama suma a lei a ni tih a sawi a, zai vela an kal nan tangkai tak anih a beisei thu a sawi. Estheri atang hian Naupang talent a haichhuah theih tih chu nu leh pa dangte pawhin zirchhuak se a duh tih a sawi nghal.

He hunah hian Estheri pu, Pu R.Zothanliana pawhin Mizo mipui zawng zawng leh sorkar chungah lawmthu sawiin, HPC V/C chungah pawh thinlung takin lawmthu a sawi.

HPC-a Chief Planning Officer Pu C.Vanlalmuana pawhin kalkhawmte lawmna thusawiin, HPC dinhmun a sawi a, Chief Minister chu Chairman niin DC chu member Secretary a ni a, HPC Vice chairman chu MoS rank anih thu te a sawi.

He hunah hian HPC Committee member, MJA, MZI leh MDM-te pawhin sawm an nih angin thu an sawi a ni.