FCAA an pass tak hian neitu nihna thuneihna min pek sadai a thiat niin tarlang

29 Nov 2025: “Kan ram Pathianin min pek hi humhalh turin ram min petu Pathian lam i hawi ang u, Ram, hnam, sakhua himna hmasawnna tur ngaihtuah hi a tha. A pawimawh ber zawk erawh Pathian duh dan i ngaihtuah hmasa ber ang u.  Pathianin hnamte tan ramri min kham sak vek a, chu ramri kham sadai thiah erawh thil tih chi a ni lo. Hnam pasalthaten ram neitu nihnate Pathianin hnamah min din a, ram min pek kan nihna min hriattir a, chu neitu nihna chu humhalhin Hnam pasalthate an lo chhuak a, hnam nihnaah movement-in min hruai lut a, pasalthate leh Mizo tawh phawt chuan a man kan pe. Chunglamin a tawk a tih chinah kan awm rih a, neitu nihna leh min humhalh nan article 371(G) hmangin ramri min kham sak. India danpui zahawm tak tak zingah hian he article 371(G) hi Mizote thinlungah pentui ni lovin martar-te’n thisenin min ziah sak a ni. Amaherawh chu tunah chuan, ZPM sawrkarin hnam pawi a khawihna FCAA an pass tak hian neitu nihna thuneihna min pek sadai a thiat a. Hei hi a pawia a pawizia hi Hnam neitute hian kan chhut ngun tulh tulh hi a tul. Ram neitu MNF-te chuan FCAA hi kan do dal zel dawn a ni” Pu Chawngthanmawia, Vice President MNF Sub Hqrs Lunglei chuan a ti.

Vawiin khan LADC inthlan lo awm tura Campaign-a Lawngtlaia zan hnih riaka zin  Pu Chawngthanmawia leh a team-te chuan Lunglei South Block III tlangdung Tawipui North I, II leh Thualthu te an rawn tlawh haw a. Hengah hian Party mipuite hmaah thuchah a sawi.

Pu Chawngthana chuan, “MNF hian hun kal tawhah tihsual tam tak, tih fuh loh tam tak kan neih hi phat tur a ni lo. MNF ruh rel chhiat tak tak theih lohna chhan hi kan unit te inni tih hi in inhriat a pawimawh. MNF Sub Hqrs Lunglei chuan Unit te pawimawh zia hi kan theihnghilh ngai lo a ni” a ti bawk.