FCRA Amendment Bill, 2026 duh loh lantir nan kawng zawh

11 Aug 2026: Council of Churches in Mizoram (CCM) bultumin vawiinah Aizawlah Foreign Contribution Regulation Act (FCRA) Amendment Bill, 2026 duh lohna lantir nan kawng zawh a ni.

Chawhma dar 10:30 a Zarkawt Traffic Point a kawngzawh tanna chu Rev. Dr. H.Vanlalruata (MPC) in kaihruaiin, Rev. Lallawmthanga (WMCM) in thu tawi a sawi a, Rev. Lalrotluanga Darngawn (EFCI) a tawngtai. Sikulpuikawn a kawngzawh tanna chu Rev. Dr. R. Lalthanmawia (BCM) in kaihruaiin Rev. Dr. K. Lallawmzuala (MPC) in thu tawi a sawi a, Rev. Suikharliana (LIKBK) a tawngtai.

Kawngzawhtute hi, “FCRA Amendment bill hi anih ang ang hian pawm chi ah kan ngai lo”

“Sakhaw zalenna dan kan neih lai kalh zawnga dan siam hi tha kan ti lo”

“Bungrua inchhuhsak theihna dan thar siam hi sut leh rawh se” tiin an aurual a ni.

Zarkawt leh Sikulpuikawn atanga kawngzawhte hi Vanapa Hall kawtah an intawkkhawm a, heta inkhawm hi CCM Treasurer Upa R. Lalmalsawma’n kaihruaiin, CCM President Rev. Dr. R. Lalbiakliana’n thu a sawi a. “Vawiinah mipui heti zat thinlung hmunkhat pua lo kalkhawmte hian FCRA Amendment bill 2026 duhlohna kan lantir leh kan dodalna hi Lalpa kan Pathian hian min hriatpui ngei ang tih ka ring a ni.
Mizoram a thlipui na tak lo thleng tur kan tawngtaina avanga Lalpa’n kan ram min hel tirte kha vawiinah hian i hrechhuak thar leh ang u. ‘Mi au la ka chhang ang che’ tia min tiamtu kan Pathian lama kan tawngtai chuan min chhang ngei dawn a ni,” a ti.

He hunah hian tawngtai rualna an nei a, One in Christ an zai bawk. CCM General Secretary Rev. Dr. Lalhmangaiha’n lawmthu sawiin, Rev. Joseph Koma Chinzah (ECM) in Malsawmnain kalkhawmte a tin a ni.