08 Feb 2024: Lunglei Municipal Council (LMC) chuan vawiin khan Board Of Councillors Meeting, BOC Meeting hall, LMC Office-ah an nei a, khawpui chhung inrelbawlna hrang hrang an sawiho.
LMC BOC Meeting hi Pu Lalzuithanga, LMC Chairman chuan a kaihruai a, Councillor kalkhawm te chu thahnem ngai taka Lunglei khawpui hmasawnna atan ngaihtuahna seng turin a sawm a ni.
Board of Councillor thukhawm chuan Parking Regulation chu a taka hmang tura inbuatsaih nise tih an rel a. Lunglei khawpui chhungah Parking area awm sa te bakah hmun engemawzatah Parking area siam belh nise tiin, khawpui chhunga Parking area-te chu March thla ral hmain Tender chhuah hman nise an ti.
Lunglei khawpui chhunga lirthei neitu, garage nei mumal lo an tam thu BOC meeting-ah hian sawilan niin, LMC chuan garage neiloten garage an neih ngei theihna tura hmalak nise tih an rel a. Thuchhuah siam nise tiin, thuchhuah siam atanga thla 6 chhung mipuite hun pek nise an ti bawk.
LMC in Dan siamin, Lunglei khawpui chhung kawng sira Insakna bungrua, lirthei chhia leh thil dang, kawng kam tihnawk theite chu khuahkhirh nise tih vawiina LMC rorel khawl thukhawm chuan an rel bawk.
Mizoram Municipal Act 2007-in thuneihna a pek anga LMC-in a thuneihna huam chhunga hman tur Sanitation Regulation a siamte a taka bawhzui dan tur pawh LMC Councillor thukhawm chuan an sawiho a. Hemi kawnga hma la tur hian Committee dinin, Committee chuan a taka hmalak dan tur lo ruahman se an ti a. Lunglei khawpui chhungah vantlang tana hnawk theia Tuichhe paihna, Septic tank, Vawk vulh, Ar vulh leh a dang te chu Dan hmanga khuahkhirh tan nise an ti a ni.
