March 11, 2024: School Education Minister Dr. Vanlalthlana chuan HSLC exam question putru nia sawi awm chu chhuichian anih hnuah Govt Mizo High school zirtirtu pakhat suspend anih thu, vawiin Assmbly thutkhawmah Statement siamin a sawi.
Minister chuan March ni 8 tlai khan HSLC exam a Social Science subject-a zawhna lo chhuak leh Govt Mizo High school zirtirtu pakhatin a zirlai naupang thenkhat zawhna lo chhuak thei, suggestion a pekte chu a inang deuh vek tih thuthang a awm hriat anih velah thuneitute chuan hemi a inhnamhnawih nia hriat chu chhuizuiin, zirtirtu hian zirlaite hnenah a pe ngei tih finfiah anih thu a sawi a, uluk taka chhui anih hnuah nasa taka darh a ni lo tih hriat anih bakah hemi school a zirlai zawng zawngin an hriat vek loh thu a sawi a, he thil thleng ngaihtuah hian Minister hoin tum hnih thutkhawm a ni a ti a, vawiin a examination committee thukhawmin thil kal zel dan tur a ngaihtuah dawn a ti a, exam hmabakte chu routine pangaia a kal tur thu a sawi bawk.
Minister chuan he thil thlenga mawhphurtu zirtirtu chu March ni 10, 2024 khan dan hmangin a hna atanga chawlh lailawk tir nghal anih thu leh MBSE chuan FIR an thehluh nghal thu a sawi a, School Edn dept. lamin Disciplinary action a lak chhunzawm tur thu a sawi bawk.
