H.Ramdinpuii Mualthuam North thah anih chungchangah mi pahnih an inpuang

20 Aug 2026: H.Ramdinpuii Mualthuam North thah anih chungchangah mi pahnih, Denghmingthanga (20) leh Lalneihkima (34) Mualthuam North ve ve te chu Lunglei Police SIT te hmaah an inpuang.

Hemi chungchangah hian Mizoram Police chuan thuchhuah hetiang hian a siam:-

H. Lalramdinpuii, Mualthuam North thah a nih chungchanga Lunglei
Police Station Case No. 84/2026, u/s 103(1)/ 140(1) BNS hnuaia thubuai chu Lunglei Police Special Investigation Team (SIT) ten a tir ațangin uluk takin hma an lain an chhui zui zel a. Rinhlelh kai thei tur thil awmte chhui chian nan mi
hrang hrangte koh an ni tawhin, mi pahnih, Denghmingthanga (20) leh
Lalneihkima (34), Mualthuam North ve ve te chu vawi tam tak thu zawh fiah turin koh an ni tawh a ni.

Police-te chuan an phone hman dan (digital evidence) leh Forensic evidence an kalpui atanga rinhlelhna awmte chu an chik chho zel a, chung finfiahna te leh zawhna chi hrang hrang an hmachhawn hnuah, vawiin
ni 20.08.2026 hian hemi te pahnih hi Lunglei Police SIT te hmaah an inpuang ta a ni.

Inpuanna an neih hnu hian dan ang takin vawiin chawhnu dar 1:00 PM
khan man nghal an ni a, danin a phut angin vawiin chawhnu vek khan Judicial Custody-ah dah nghal an ni bawk. H. Lalramdinpuii thah a nih chungchanga thil thlen dan kimchang leh finfiahna (evidence) hrang hrangte erawh tun dinhmunah dan kenkawhte leh he thubuai chhui zelna tibuai thei tur a nih avangin la tarlan theih a ni rih lova, he tualthahna hi Investigation kal lai mek niin finiahna (evidence) hrang hrang leh kaihhnawih thil te la chhuizui zel nin
a tul angin thuchhuah siam zel a ni ang.

Mipuite chu Police hnuchhuitute hmalakna ngaichang zel tur leh mahni thu a hma la mai lo turin kan insawm a ni.