H.Ramdinpuii thihna chhui chungchangah YMA Sub Hqrs Lungleiin lawmthu a sawi

20 Aug 2026: YMA Sub Hqrs Lunglei chuan thuchhuah siamin, Ni 03.08.2026 (Thawhtanni) zana chin hriat loha bo, NI.H.Ramdinpuii (Kum-15) D/o H.Lalawmpuia, Mualthuam North, Ni 05.08.2026 (Nilaini) a thi a hmuh anih chhanah theihtawp chhuaha hnuchhui hna thawktu Mizoram Police, a bik takin Lunglei Police Special Investigation Team (SIT) te chungah lawmthu an sawi tih an tarlang a, hun kaltaah pawh Lunglei Police-te, misual hnuchhui kawngah an fakawm thin tak zet a ni, an ti.

NI.H.Ramdinpui tualthihna chhana YMA Mualthuam North Branch, YMA Vanva Group- hruaitute leh member-te hmalakna a chhuanawm an ti a, pawikhawihtu chhuinaah Police te theih tawp a an thawhpuina pawh a hluin, khawtual boruak hrehawm tak hnuaia khawtlang tana ke an penna a hlu an tih thu an sawi a. He vanduaina thleng chhana an tlawmngaihna leh thawhrimna a ropuiin, khawtlangin hun harsa tak leh nu nau thlabar te, muan an ngaih hunah hruaitu leh member-te an inchhi eng hian, YMA mai ni lo; Mizo hmel a ti mawi a, kan chhuang tak zet a ni, an ti.

YMA Sub-Hqrs Lunglei chuan, NI.H.Ramdinpuii hliamna tak tuar a, rawng taka a nunna laksak a ni hi an lainatin, tualthattute hi an dem takzet tih an sawi a. Hetianga tualthihna rapthlak tak kan khawtuala a thleng ta fo leh, hmeichhe awm nem leh chak lo zawkte tana kan khawtlang a ralmuang tawk ta lo nia lang chu a pawi an tih thu an sawi a. He tualthihna rapthlak taka pawikhawihtute hi thuneituten an phu ang ngei hremna pe ngei se tih chu an duh dan anih thu an sawi.

Hetiang thil rapthlak tak kan hnam leh Kristian kan nihna thlenga min ti thang tlawmtu hi thleng nawn tawh lo se, tih chu YMA Sub-Hqrs Lunglei chuan a duh tak meuh tih an sawi a.

NI.H.Ramdinpuii kalsan tak chhungkua leh laina bakah, he thihna in a tuam Mualthuam North khawtlang mipuite, Pathianin thlamuanin awmpui se tih chu an tawngtaina a nih thu an sawi a ni.