14 January 2025: Vawiin chawhnu khan Aizawl-a Secretariat Conference Hall, MINECO-ah krismas leh kumthar vuakvet a halpuah leh halmawi khuahkhirhna kalpui dan thlirletna hun ‘Review Meeting of Prohibition of Fire Crackers and other Pyrotechnic material’ neih a ni a. Home Minister Pu K.Sapdanga’n he hun hi kaihruaiin Pu Khilli Ram Meena, Chief Secretary, Pu Anil Shukla, DGP, Home Secretary, Environment, Forest & Climate Change Department, Mizoram Pollution Control Board, I&PR Dept, Health & Family Welfare Dept, Deputy Commissioner, Superintendent of Police, Aizawl, Fire & Emergency Services, Aizawl City Local Council Association, Central YMA te an tel.
Thlirletna hun a tarlan danin Mizoram pum a halpuah leh halmawi kaihhnawih thupek bawhchhiatna avanga case ziah luh 55 zing a 48 chu Aizawl district huam chhung ami a ni. Lungleiah case 1, Champhaiah 5, Serchhipah 1 a awm a. Heng thubuai kaihhnawih a bungrua man khawm hlutna hi Rs nuai 24 a chuang a ni. Pollution Control Board atanga tarlan danin Aizawl khawpui a kum 2023 Dec ni 31 zan a boruak thianghlim lam tehna, Air Quality Index (AQI) chu 597 a nih laiin kum 2024 Dec ni 31 zanah erawh 115 a ni a, Mizoram district hrang hranga AQI Manual Station atanga a lan danin district dangte pawh AQI 50 hnuai lamah a awm deuh vek thu tarlan a ni a, Mizoram chu India ram a boruak thianghlimna ber State ni tur a tan lak a pawimawh thu sawi a ni. Health & Family Welfare Department tarlan danin kumhlui thlah zan khan, Aizawl Civil Hospital-ah halpuah leh halmawi avanga inhliam leh harsatna tawk, Damdawi in a inentir an awm lo a ni.
Thutkhawmnaah hian District Headquarters huam chhung a halpuah leh halmawi hal ve miah lohna veng/khuate chu lawmpuina thuziak pek vek nise tih rel a ni a. Halpuah leh halmawi khuahkhirhna kalpui zel dan tur ruahmanna siam turin ‘Working Committee’ din ni se tih rel a ni bawk.
