Hand Holding pilot phase atana thawhpui tur thlan kumin Feb ni 20 ah peih hman ni se, an ti
10 Jan 2025: Vawiin khan Chief Minister Pu Lalduhoma kaihhruaiin Mizoram State Policy Coordination Committee te chu CM Conference hall-ah an thukhawm a, Hand Holding pilot phase atana thawhpui tur (progress partner) thlan chu kumin February ni 20 ah peih hman ni se, an ti.
Pilot phase atana thawhpui tur (progress partner) thlan kawngah Detail Project Report (DPR) neih tel zel a tul avangin hun a duh deuh a, CM Special package hmanga pek chhuah tur zat (allotment) hi vawiin meeting hian a tipung bawk a. Heng tihfel nan hian hun tlem a la ngaih avangin line Department te chu February ni 20 hmaa an lehkhate Planning Department-a thehlut fel turin an ti a ni.
Pilot Phase atana dilna hun hi khar tawh a ni a, dilna lut tawh zinga hnawl (rejected) ni lo ho zawng chu phase lo awm leh tur atana rin zui theihin line department ten an dah tha (shelved) a ni. Meeting-ah hian line department changtu Minister te leh Mizoram State Policy Coordination Committee member te an tel a ni.
