Health Minister–in damlo ten pawisa pe lawk lo va Damdawi Ina an inenkawl theihna tur kalpui anih tur thu a sawi
08 Feb 2024: Health Minister Pi Lalrinpuii chuan damlo ten pawisa pe lawk lo va Damdawi Ina an inenkawl theihna tur kalpui anih tur thu a sawi. Hei hi Mizoram Universal Health Care Scheme hnuai ami tur a ni ang.
Vawiin khan Pi Lalrinpuii hian a Pisa-ah Chanchinbu mite a kawm a, Health Minister chuan Mizoram sorkarin damlote inenkawlna tur tha zawk a ruahman tih sawiin pawisa pe lawk lo va Damdawi Ina an inenkawl theihna tur bakah, kum khatah cheng nuaih nga thleng senso hmuh let (bill) theihna kalpui an tum tih a sawi bawk.
Minister chuan Mizoram Universal Health Care Scheme atan hian sum hmuhna tur, sum hman dan tur leh bill siam theih chi hrang hrangte uluk takin an buaipui mek tih a sawi bawk a ni.
Aizawla Civil Hospital chu mipuiin an bawh nasa tih sawiin, Damdawi In hi a tawt a, chumi tihziaawm nan chuan Kulikawn Hospital chu tihchangtlun a nih tur thu sawiin, Civil Hospital Annexe siam nan hian State Level Executive Committee chuan cheng vaibelchhe 89 leh nuaih 68 a pawmsak tawh tih a sawi bawk.
Mizoram district hrang hrangah Health Department chuan hma a lak thu sawiin, District Hospital 10-ah te chuan thisen leh zun test-na Laboratory changtlung tak din tuma hmalak mek a ni tih sawiin, a thawh khatna atan District pathum – Siaha, Hnahthial leh Champhaiah te hmalak hmasak mek a ni, a ti.
Health Minister chuan hna thawktu indaih lohna chungchang sawi zuiin, SEDP hnuaia Nurse leh Health Worker te chu rawih chhunzawmna tur sum a awm tawh loh avangin chawlhtir an ni tih a sawi a. Hemi avanga Health Sector awm palh thei venna turin thawktu awmsa semrual tura hmalak niin, department lama hotuten an zir chiang mek niin a sawi. Thawktu indaih lohna zualpui phuhruk nan hian Nurse 143 lak belh tumna chu sorkar thuneitulamah thlen mek a ni, a ti bawk.
Pi Lalrinpuii hian Ruang thawn leh phurh chungchangah pawh Mizoram sorkarin mumal zawkin hma a la dawn tih sawiin, ruang phurhna senso tur sum pawh Budget Session an neih hunah Pass theih tura dah an tum thu a sawi.
