Antibiotic damdawi dik taka hman a pawimawh

12 Nov 2026: Vawiin khan National Pharmacy Week 2026 pualin Antimicrobial Resistance (AMR) Awareness Rally chu Mizoram State Pharmacy Council-in a buatsaih a, Health & Family Welfare Minister Pi Lalrinpuii chu khuallian niin he rally hi a vai liam.

He hunah hian Health Minister Pi Lalrinpuii chuan, he awareness programme thupui, “Swasth Bharat: Combating Antimicrobial Resistance” tih hian tunlai khawvelina a hmachhawn mek leh a ngaih pawimawh, Antimicrobial Resistance (AMR) chungchang a tarlan thu sawiin, Antibiotic damdawi te chu hman tlak ni zel tura humhalh tur leh nakin hun atana a hna a thawh zel theih nana humhalh turin; Pharmacist-te’n mawhphurhna lian tak an neih thu a sawi.

Minister chuan AMR awareness rally chu antibiotic damdawi dik taka hman inzirtirna a nih angin, mamawh a nih chauhva qualified healthcare professional thurawn ang zela hman tur a ni tih chu vawiin thuchah pawimawh ber ni se a duh thu a sawi a, damdawi dik taka hman pawimawhna chu mipuite hnena thehdarh zel turin kalkhawmte a fuih a ni.

Vawiin inkhawm hi Dr. H.Lalhlenmawia, Executive Member, Pharmacy Council of India chuan kaihruaiin, Health Minister Pi Lalrinpuii, Dr.Zothanpuia, President, Mizoram Pharmacists Association leh Pu Lalsawma Pachuau, President, Mizoram State Pharmacy Council te’n thu an sawi. 

Rally hi Millenium Centre kawt atanga tanin Vanapa Hall-ah a tawp kharna hun hman a ni a, Dr. Zothanpuia, President, Mizoram Pharmacists Association-in thuchah tawi hmangin rally kharna hun a hmang a ni.

He National Pharmacy Week 2026 pual vek hian naktuk ni 13 November, 2026 hian State Level Celebration hman tur a ni bawk.