Ni eng chakna hmanga sangha vulh dan zir

10 Nov 2026: SELCO Foundation, Department of Fisheries leh Planning & Programme Implementation Department te ṭangkawp chuan ni hnih chhung (10-11 November 2026) awh tur Recirculating Aquaculture System (RAS) hawnna leh a kaihhnawih training chu Chawnga Farms, Zero Point, Bairabi-ah neih a ni.

He hunah hian Dr. Lalrinchhana, Principal Adviser-cum-Additional Secretary, Planning & Programme Implementation Department, Government of Mizoram leh Pi Zonuntluangi, Director, Department of Fisheries te chu khuallian a ṭhangin, Mizoram hmun hrang hrang aṭanga sangha vulhtu hlawhtling zual thlan chhuah mi 11 te nen he hun hi an hmang ho a ni.

He huna khuallian Dr. Lalrinchhana chuan, “Mizoram-a kan sangha dilte hi ruah sur tam vang te, tuilian leh khuarel chhiatna hrang hrang vang te, tin natna hrang hrang vang tein nasa takin sangha vulhtuten kan tuar ṭhin a. Khawvel changkang zelah sangha vulh dan thar chi hrang hrangte pawh hmuh chhuah zel a ni a, chung zinga mi chu Recirculating Aquaculture System (RAS) kan tih hi a ni. Hei hi sik leh sa danglam chak tak laka invenna leh dona kawnga hmalakna pawimawh tak niin, ni eng chakna (solar power) hmanga sangha vulh dan a ni a; hei hian sangha vulhtute nasa takin hma a sawntir ngei kan beisei a ni,” a ti.

Pi Zonuntluangi, Director, Department of Fisheries pawhin thusawi in, “SELCO Foundation te nena kan ṭanrualna zarah nasa takin kan sangha vulhtuten hma an sawn a, an la sawn belh zel pawh a rinawm a ni. Keini lam pawhin thawhhona ṭha tak kan neih zui zel hi kan beisei a ni,” a ti bawk.

He training chhung hian SELCO Foundation te chuan sangha vulhtute hnenah ni eng chakna (Solar Energy) hmanga sangha vulh dan te, a chaw pek dan te, sangha chawm len leh tihkeuh dan te, leh a enkawl zui dan chi hrang hrangte kimchang takin an zirtir a ni.

SELCO Foundation te hian Mizoram Sawrkar nena ṭangkawpin Mizoram hmun hrang hrang, a kilkhawr ber ber thlengin hriselna lamah te leh eizawnna tihhmasawnna kawngah te nasa takin mipuite an pui mek a ni.