29 Dec 2023: Health Minister Pi Lalrinpuii,Lunglei East bialtu ni bawk chuan District hrang hrang Hospital tihchangtlun a ni ang a, Lunglei Civil Hospital chu a bulṭanna tur a ni ang, a ti.
Health Minister Pi Lalrinpuii chuan he thu hi nimin leh vawiin-a a bial chhung Leite, Rotlang East, Dâwn, Ralvawng leh Zobawk khuáte a tlawhnaah a sawi a, khawtlâng hruaitute nen inkawmhona hun an hmang a ni. Heng khaw hrang hrang tlawhnaa vantlâng inkhawm tawi buatsaihah Health Minister Pi Lalrinpuii chuan, Inthlana chak zawk nih tumin party hrang hrangte kan inbei ṭhin a, keimah aṭang leh kan party worker-te aṭanga mi rilru hliam palh kan neihna zawng zawngah ngaihdam ka dil a ni, a ti a. ZPM sawrkárah chuan party inthliár hranna a awm ve dawn loh thu leh, Health Minister anih angin Lunglei East bial mai ni lo, bial zawng zawng tana Minister anih tur thu a sawi.
Pi Rinpuii chuan bial mipuite leh Zoram mipuite beiseina ang ngeia hmasâwnna hrang hrang hnathawh kawngah theihtawp chhuaha hmalâk a tum thu a sawi a, District hrang hrang Hospital-te chu tihchangtlun anih tur thu leh, thawktu indaih lohna pawh a ṭul anga hnawhkhah thuai a nih tur thu sawiin, Lunglei Civil Hospital chu an bulṭanna tur anih thu leh, hun reiloteah Lunglei Civil Hospital ICU pawh hman theih thuai a beisei thu a sawi.
Health Minister chuan chhim lam aiawh MLA-te chu pheikhái rual takin ke an pén ho zél dawn tih sawiin, chhim mipuite nat ruala na ve thei MLA an nih dawn thu leh Lunglei kawng a chhiat an phal dawn lo tih a sawi bawk a ni.
