Health minister-in State Drug Testing Laboratory hman tangkai thuai a tul, a ti
09 Oct 2024: Vawiin chawhma khan Pi Lalrinpuii, Minister, Health & Family Welfare Department chuan State Drug Testing Laboratory, MINECO-a tlawh a. Pi Sangchhin Chinzah, Secretary, Dr. Vanlalsawma, Principal Director, Pu Lalsawma Pachuau, Joint Director, Food & Drugs Administration, Pu F.Lalliantluanga, Deputy Director leh thawktu dangte an tel.
Health Minister Pi Lalrinpuii chuan Ministry of Health & Family Welfare hnuai a ‘Strengthening of State Drugs Regulatory System’ kaltlangin State Drug Testing Laboratory building sak anih bakah khawl tha leh changkang tak tak lei a ni chu lawmawm a tih rualin, mipuiin an hman tangkai thuai theih nan thawktu indah vat a pawimawh thu a sawi a, a tak a hman tangkai thuai anih theih nan a tul anga hma la turin thawktute a chah a ni.
Pu Lalsawma Pachuau, Joint Director, Food & Drugs Administration tarlan danin Drugs Testing Laboratory Building hi Rs vaibelchhia 9 hmangin kum 2021 khan sak niin damdawi endikna khawl chi hrang hrang 36 a keng tel a. Tunah hian Drugs Testing Laboratory hi a tak a hna thawk tur chuan thawktu lak belh a ngaih thu sawiin, tun dinhmunah thawktu Junior Analyst – 3 posts, Laboratory Attendant – 2 posts, LDC – 1 post leh IV Grade – 2 post te chu sawrkarah dil mek a nih thu a sawi bawk.
Thawktute tarlan danin State Drug Testing Laboratory hi anih dan tur a kalpui anih chuan, kum khatah damdawi sample 1000 endik thei tura ngaih a ni a. A chhunga khawl awm te hi changkang leh chhuak thar ber berte an nih thu an sawi. Hetih lai hian kum 2022-23 chhung a damdawi endik tura thawn chhuah 121 atanga 17-te chu ‘Not of Standard Quality’ an ni tih hmuhchhuah a ni.
