14 Feb 2025: Vawiin chhun khan Mizoram sawrkar doctor Association (MGDA) te chuan Aijal Club-ah Annual General Conference vawi 39-na an hmang a. Chief Minister Pu Lalduhoma chuan a hawnna inkhawm a hmanpui. Chief Minister-in a hmanpui phalna hi MGDA lam chuan State Election Commission-ah an la a ni. A hawnna inkhawm hi Dr. C.Lalhrekima, President, MGDA chuan a kaihruai a ni.
Pu Lalduhoma chuan, Ram hmasawn nan mipuite hriselna a pawimawh avangin sawrkar chuan damdawiin te, centre te a din a, a vil turin daktawr leh thawktu dangte a la a, mipuite an hrisel theih nan nangmahniah sawrkarin investment a kalpui tihna a ni. Investment reng reng chu a lo kir leh tur hisapa neih zel a ni a, kan daktawr te pawh hi ram tana hlawk taka hna thawk tura kan beisei te in ni, a ti. In tangkaizia leh in hlutzia chu ramin harsatna a tawh niah te, mimal leh chhungkuain vanduaina kan tawh niah te a lo lang fiah thin. Covid hripuiin min chim lai khan hri kai huamin damlote in enkawl a nih kha. In hnathawhah kan lawm a, chhunzawm zel turin ka ngen che u a ni, a ti.
Pu Lalduhoma chuan, tun hnaiah sawrkar daktawr leh damdawiin duhkhawp lohna thawm kan hre leh zauh thin. Geneva Declaration of World Medical Council leh Code of Medical Ethics Regulation 2002 hmanga ven in ni a. Damlote enkawlna kawngah hian tisual thei turah pawh kan ngai lo che u a ni. Tin, tuten emaw dik tawk lo deuha min puhna ang chiah phei chuan a sawifiahna press release siam ve thuai zel pawh a tha awm e, a ti.
Chief minister chuan tun hnaiah MPSC-in daktawr pakua lakna result a tihchhuah thu te, Health Workers 100 lakna tur phalna pek an nih tawh thu leh nurse pawh engemawzat lak phalna pek an nih tawh thu a sawi.
Khawzawl district Hospital te, Saitual district Hospital te, Hnahthial district Hospital te, Serchhip district hospital te sak mek anih thu te, Lunglei Civil Hospital Laboratory leh Quarters unit 6 sak mek anih thu te, Lawngtlai Hospital-ah Dialysis unit sak mek anih thu leh District hrang hranga Trauma centres te pawh thuam that anih thu Pu Lalduhom-a hian a sawi a. MR Bill an release tawh chu Rs. vbch 90. 28 a tlin tawh thu a sawi bawk.
