27 Feb 2025: Vawiin khan Lungleiah helpline number pathum – 112, 181 leh 1098 te mipuite hriata puanzarna atana kawng zawh, “One Nation One Helpline Rally” buatsaih a ni a, Sr CMO office kawt aṭanga Lunglei Police Station thleng thuziak kengin kawng zawh a ni.
Lunglei District Additional Deputy Commissioner Pi Rochuangkimi Khenglawt chuan kawng zawh turte hi a vai liam a. Ṭanpuina mamawhte tana helpline number pathum chu Lunglei khawpui chhungah mipuiin an hmelhriat a, an hman ṭangkai theih nan kawng zawh chu buatsaih a nih thu sawiin, mipuite chu harsatna tawk, ṭanpui ngai an hmuhin, anmahniin an ṭanpui thei lo a nih pawhin helpline kaltlanga a ṭanpui theitute hnena thlen chu ṭanpuina kawng khat tho a ni tih hre tur leh helpline chu hman ṭangkai zel tum turin a chah a ni.
Kawng zawh puala inkhawm tawi buatsaih hi Lunglei District Hub for Empowerment of Women (DHEW)-a Account Assistant Pu R. Lalsanglura’n a kaihruai a. Kawng zawh tawpa a kharna hun buatsaihah Lunglei District Additional Superintendent of Police Pu K. Beihmotaosa chuan helpline no. 112 chungchang a sawi fiah a. 112-a harsatna thlente chu Aizawla State Data Centre-ah lut phawtin, chuta ṭang chuan district data centre-ah thawn chhawn leh ṭhin a nih thu sawiin, 112 hmangin Lunglei District-ah case pakhat a awm tawh tih tar langin, 112 hmet hman lote tan smartphone-ah a power button rang taka vawi 3 hmehin 112 a in-dial nghal thei bawk tih a sawi a ni.
In chhung khur leh khawlaia naupang harsatna tawk, ṭanpui ngaite tana biak pawh tur, child helpline 1098 chungchang chu Lunglei District Child Protection Unit-a Child Helpline Unit Counsellor Pu Robin Lalramnuama’n a sawi fiah a. Naupang kum 18 hnuai lam ṭanpui leh ven him ngaite tan eng tik lai pawhin, balance nei lo pawhin a biak pawh theih tih a sawi a, Child helpline kal tlang hian case 224 dawn tawh a ni tih a sawi.
Hmeichhia hleilenna leh harsatna tawkte tana biak pawh tur, women helpline 181 chungchang chu Lunglei One Stop Centre-a Centre Administrator Pi Laldanmawii’n a sawi fiah a, Serkawna Baptist Higher Secondary School bula One Stop Centre chu hmeichhe harsatna tawk, a mamawhtute tan pan theih reng a nih thu a sawi bawk.
One Nation One Helpline Rally hi hmeichhe naupangte chawi kanna tura hma lakna, Beti Bachao Beti Padhao (BBBP) scheme-in kum 10 a tlin puala buatsaih niin, kawng zawhah hian Women & Child Development hnuaia DPO, DCPO, DHEW leh OSC-a thawktute, police-te, official dangte leh Electric Veng Local PYD member-te an tel a ni. (DIPR)
