13 Feb 2025: MSACS chhinchhiah danin Kum 2024 April thla atanga vawiin thleng khan HIV Positive hmuhchhuah thar 1669 an awm, heng zinga 1015 hi hmeichhiat mipat hmanna avanga kai a ni.
Mizoram State AIDS Control Society, AIDS Healthcare Foundation India Cares leh Samaritan Society of Mizoram-te hmalaknain vawiin khan “International Condom Day” chu Millennium Centre Roof Top-ah hman a ni a, he hunah hian Mizoram State AIDS Control Society Project Director Dr. Jane R.Ralte chuan Generation C Campaign leh Love Brigade 2.0″ Campaign a hawng nghal bawk a ni.
Vawiina hun hmanah hian Mizorama HIV kai hmuhchhuah tawh zinga 60% aia tam chu mipat hmeichhiatna atanga kaite an ni tih tarlangin HIV kai hmuhchhuah tawhte hian HIV inkaichhawn dan an sawi thei deuh vek tih leh ngaihzawng kawppui nghet leh an mi hriatchiante mipat hmeichhiatna an hmanpuinaah condom an hman loh vanga HIV kai an ni deuh vek tih tarlan a ni bawk.
Generation C Campaign-ah hian thalaite hnenah condom hman tangkaina leh a pawimawhna zirtirna ngawr ngawr ni lovin, nupui/pasal neih hma chu mipat hmeichhiatna hman loh a him ber thu zirtirna uar taka kalpui a ni dawn a ni.
Love Brigade Campaign hi kum 2020 khan kalpui lo ni tawh bawkin tun tumah hian Two Wheelers Taxi Association-te nena tangkawpin Two Wheelers Taxi Driver eng emaw zat hnenah Condom Jacket sem a ni a, Aizawla Auto Drivers Association te hnenah HIV chungchang zirtirna hmanrua dahna tur seat cover engemaw zat sem a ni bawk. (DD)
