Hmalakna a awm thuai loh chuan kawng block tum

07 March 2026: Nizana Jt. YMA Zobawk Executive Committee Meeting chuan an khaw chhunga National Highway kawng laih mek chungchanga an hmalakna kal mekte thlir hovin, an beisei ang hmalakna a awm thuai loh chuan March ni 16, 2026 atangin Kawng Block an tum.

Jt.YMA Zobawk hruaitute chuan kawngpui siam hna thawktu Company-te chu February thla chhung khan Blacktop ti vek tura tih an nih laiin chhuanlam hrang hrangte avangin thawh mumal a ni lo niin an sawi a, tunah hian hma an lak leh mek thu leh March ni 14 thleng an ngaichang dawn tih sawiin, an beisei anga hnathawh anih loh chuan March ni 16, 2026 atangin kawngpui hi dan chah / block leh mai nise an ti a ni.

Jt.YMA Zobawk hruaitute sawi danin, laih theih mai leh Retaining Wall siam theih tam tak a awm a, an hna a muang em em a, fur anih leh mai a hlauhawm a, tunah khua a ro va, kawng a khu si a, hritlang awmna a tam em em a, hriselna atan a tha lo hle a, vawi tamtak hnathawk chak tura Company lam an ngen hnu pawhin awmzia a neih thui loh avangin hmalak dan tur kawng dang awma an hriat loh thu leh kawngpui danchah leh mai chu hmalak theih dan awm chhun nia an hriat thu kan Palai an hrilh a ni.