Hmar leh Zomi inkar buaina a tawp theih nan MZP kaihhruaina hnuaiah hmalakho remti
21 March 2025: Manipura Hmar leh Zomi inkar buaina thleng a tawp theih nan MZP kaihhruaina hnuaiah Hmar Students’ Association leh Siamsinpawlpi ten hmalakho zel an remti a, Zofa Global Network pawhin remna awm thuai se an duh tih an sawi bawk.
He buaina chungchangah vawiin khan MZP Pisapui Aizawl-ah MZP hruaitute kaihhruaina hnuaiah Hmar Students’ Association leh Siamsinpawlpi hruaitute chuan Mizoramah buaina a kan kai zel loh nan leh remna a awm theih nan hmalak ho zel dan tur an sawiho a, thuchhuah intawm siamin, Manipura Zofate inkara buaina thleng pawi an tih thu leh inremna a awm theih nan theihtawpa hmalak ho zel nise an ti a, Hmar Students’Association ten, Zomi te tan pawm harsa tak thuchhuah a siam avanga rilru na leh thlabar an awm avangin ngaihdam an dil a, Siamsinpawlpi pawhin hemi avanga Police station pathum a FIR an lo thehluh tawh pawh hnuhdawh an remti bawk a ni.
Hetih rual hian Zofa Global Network pawhin thuchhuah siamin, khawvel hmun hrang hranga Zofate inpumkhat tura ke pe a nih mek laia unau hmelhai a thleng chu pawi an tih thu leh an inkarah remna awm thuai se an duh tak zet tih an tarlang bawk a ni. (DD Aizawl)
