23 Aug 2025: Vawiin khan The Juvenile Justice Committee, Gauhati High Court buatsaih “State Level Multi-Stakeholders Consultation on Safeguarding The Girl Child : Towards a Safer and Enabling Environment for Her in India” tih thupui hmanga inrawnkhawmna chu Gauhati High Court, Aizawl Bench Conference Hall-ah neih a ni.
He hunah hian Social Welfare, Women & Child Development Minister Pi Lalrinpuii pawh telin thu a sawi a, amah pawhin a ngaih pawimawh leh a vei em em thin hmeichhe naupang himna chungchanga hma kan sawn lehzualna tura inrawnkhawmna hun buatsaih a nih chu lawmawm a tih thu sawiin, Mizo khawtlangah hmeichhiate kan zalenin kan vannei em em a, chutih rual chuan hmasawn zel kan la ngai a ni tih sawiin hmeichhe naupangten an inchhungkhur mai bakah sikulah leh khawtlangah thlamuang taka an awm theih nan kan venpui reng a tul a, sawrkar hmalakna bik tur ni lovin kohhran, khawtlang leh tlawmngai pawl hrang hrangte bakah zirtirtute nen thawhhona tha tak neih chhunzawm zel a pawimawh thu a sawi a ni.
Justice Michael Zothankhuma, Judge, Gauhati High Court pawhin thu sawiin India ramin dan chi hrang hrang hmanga hmeichhe naupangte chanvo leh humhimna a siam thu leh kan zawm that a pawimawh thu a sawi a, Mizoramah a vawikhatna atana hetiang hun buatsaih a nih chu hmasawnna pawimawh tak a nih thu leh hei hian awmze nei zawka hmeichhe naupangte humhim kawngah hmasawnna a thlen ngei a beisei thu a sawi bawk a ni.
Thupui pawimawh tak tak thlanchhuah “Safeguarding the Girl Child : Towards a Safer and Enabling Environment for Her in India”, “Creating a Safer World – Role of judiciary, Enforcement Agencies and Other Resource Agencies” tih hmangin sawihona hun hman a ni a, Women & Child Development Department, Health & Family Welfare Department, School Education Department, Mizoram State Commission for Protection of Child Rights (MSCPCR) leh Rural Development & Administration Department ten presentation an pe a sawihona neih a ni bawk.
