Lunglei; 1st November 2023: Nimin chhun khan MZP General-Headquarters Aizawl hruaituten MZP Headquarters Lunglei Office, Venglai-ah thuthar thehdarhtute an kawm a; Mizoram MLA General Election lo awm turah MZP-in hnamdang pasal nei candidate-a dah lo tura political party tinte vawi tam an lo ngen tawh chungchanga an hmalak mekna leh hmalak zui an tum dante an sawi. MZP Gen-Hqrs Aizawl hruaitute hi MZP Hqrs Lunglei hruaitute’n an tawiawm a ni.
He hunah hian MZP Gen-Hqrs Aizawl hruaitute chuan MZP chuan kan hma lawk November ni 7, 2023-a Mizoram MLA General Election lo awm turah hnamdang pasal nei candidate-a dah lo tura political party tinte vawi tam a lo ngen tawh ngaipawimawha hnamdang pasal nei candidate-a dahlo party-te chungah MZP chuan lawmthu a sawi tak meuh meuh a ni, an ti a. MZP hruaitute’n an sawi danin, MZP chuan December ni 19, 2022 khan political party tinte hnamdang pasal nei candidate-a dahlo turin ngenna a siam a; August ni 21, 2023 khan party tinte hnenah ngenna a thawn nawn leh vek a; party thenkhat hotute pawh hmuh an ni bawk. October ni 13, 2023 khan Aizawl-a MZP Pisapui-ah Press Conference neih niin; candidate-a hnamdang pasal neite dahlo turin ngenna siam nawn leh a ni. MZP hmalakna-in ngaihpawimawh a hlawh loh avangin MZP Gen-Hqrs Aizawl chuan October ni 20, 2023 (Zirtawpni) khan Aizawl khawpui chhungah “Hnam humhimna kawngzawh” a huaihawt a; zirlai a sang têl an thawkchhuak a ni.
MZP Gen-Hqrs Aizawl hruaitute chuan, Congress Party-in Lunglei South constituency candidate tura an dah Pi Meriam L Hrangchal pasal Pu Dipen Zoliana hi hnamdang a ni, an ti a. A intih Mizo leh Mizo-loh te, khawtlang tana an tangkai leh tangkai-loh te, Tribal Certificate a neih leh neih-loh te hi kan issue a ni lo, an ti. Hnamdang dik tak a nih avangin a nupui Pi Meriam L Hrangchal hi Mizoram Assembly House-a thu turin kan hnam tan a him lo takzet a; tuna kan hmalakna-in awmzia a neih loh chuan hnamdang pasal neite kaltlangin kan ram rorelna chu hnamdang kutah a luh mai a hlauhawm hle a ni, an ti.
Mizo hnam damna turin MZP chuan hnamdang pasal nei candidate hnawla vote lo ngam turin Mizo mipuite a ngen tak meuh meuh a ni, an ti a. Vawi tam tak kan ngen chunga hetiang mi candidate-a dah luitu party pawh MZP chuan tun inthlan lo awm turah hnawl ngam turin Mizo mipuite a ngen takzet a ni tiin MZP hruaitute chuan an sawi.
Bial chhung lamah pawh boruak thlir chung zela hma lak zui an tum thu MZP hruaitute chuan an sawi bawk a ni.
