19 June 2024: Mizoram Thalai Kristian Pawl (MTKP) rorel 2024-in a lo pass tawh angin hriselna atana hmalakna khuhhawnna “Hriselna atan tlan” tih hun chu MTKP buatsaihin tukin khan Lunglei khawpuiah hman a ni.
Tukin zing dar 6:00 atang khan Lunglei khawpui chhim lam leh hmar lam atangin TKP member thahnem takte chuan tlanin Venglai Tennis Court hmun hlui an pan khawm a, hetah hian hun hman a ni.
Inkhawm hi Rbt.F.Lalremruatpuia MTKP Vice President chuan kaihruaiin, Upa R.Lalrochama MTKP President chuan hunserh hmangin, Krista leh Kohhran tan rilru hrisel leh taksa hrisel nei turin Pathianin taksa vawng thianghlim tura min tih anga kan nun angai, a ti.
He huna kalkhawmte hian MTKP Secretary Rev.F.Zorinkhuma kaihhruaina hnuaiah ‘Thalai Kristian Pawl member-te’n hriselna kawngah hma la turin vawiin atang hian ka intiam e’, ‘Vawiin atang hian hriselna pawimawh zia hriain taksa insawizawi pawimawh zia hriain theihtawp ka chhuah anga midangte zirtirtu nih ka tum tlat ang’ tihte leh ‘Hriselna atan ei leh in kawngah vawiin atang hian insum ka tum tlat ang’ tih te hmangin thu an tiam a ni.
Pastor bial leh Unit ah te hmalakna kalpui chhunzawm zel tum a nih thu Rev.F.Zorinkhuma chuan a sawi a ni.
He hunah hian Pu James Miahlung Addl.D.C Lunglei leh Dr.Lalrinthangi Dy.Chief Medical Officer Lunglei te’n thu an sawi bawk.
‘Hriselna atan tlan’ tih hun hi tukin vek khan Mizoram chhung hmun hrang hrangah TKP ten an hmang a ni.
