29 Sept 2025: Vawiin khan Mizoram sawrkar, Synod Revival leh Central YMA-te ṭangkawpin ruihhlo ngaite chhanchhuana a buatsaih mek HULHLIAP Short Stay Center Batch 4-na neih ṭan leh a ni. Camper-te thlahna hi Central YMA Hall leh Bawngkawn YMA Hall-ah hman a ni a, camper 200 vel an lut.
Camper-te dawnsawnna leh thlahna inkhawmah hian Pu Malsawmzuala Ralte, Chairman MYC leh Hulhliap SSC bakah Pu Rex Zarzoliana Vanchhawng, SP Aizawl, Pu Peter Zohmingthanga, Joint Commissoner Excise and Narcotics leh Pu Roneihthanga, Treasurer CYMA ten fuihna thuchah an sawi a. Hulhliap SSC Camping hian ni 20 chhung a awh ang.
Hulhliap SSC Batch hmasa lama chhuak tawh mi enge maw zat chu kutthemthiam zirna (Skill Development Trainning) neihpui tawh an ni a. Sawrkar aṭanga Certificate dawngin mahni kea dinga eizawnnna bul ṭan pawh an awm nual tawh a ni. (DIPR)
