27 Feb 2025: Vawiin khan Mizoram University Auditorium ah NITI Aayog State Support Mission hmalakna hnuaiah Women Led Development through Entreprenuership workshop neih a ni a. Chief Minister Pu Lalduhoma chu khuallian niin Women Entreprenuership Platform (WEP) Mizoram Chapter a hawng a, Dr. VK Paul, Member, NITI Aayog chu khualzahawm a ni.
Chief Minister chuan, India hmarchhak a NITI WEP chapter bultan nana Mizoram an rawn thlan avangin NITI Aayog thuneitute chungah lawmthu a sawi a. A hlawhtlin theih nana a tir atanga engkim buaipuitu Pu Lalnghinglova Hmar, Minister chungah lawmthu a sawi bawk. Dr. VK Paula’n min rawn telpui hi vannei kan inti a, rah tha a chhuah ngei ka ring a ni. Mizoram economy- ah hmeichhiaten an thawhhlawk hle a, kan sawrkar hian thalai, entreprenuer tha te tan Bana Kaih Scheme kan kalpui tan a. Tunah hian pilot phase-ah Progress Partner 517 te chu thawhpui turin kan thlang tawh a, an zinga 140 (27%) chu hmeichhia an ni. He scheme hi kan hmeichhia tam zawk ten an rawn chhawr zel pawh kan beisei, a ti.
Dr. VK Paul, Member, NITI Aayog pawhin thusawiin, Mizorama hmeichhia mahni kea dinga, sumdawnna kalpuiten vawiina Chief Minister in min hawnsak tak Women Entreprenuership Platform hi in tangkaipui ngei ngei dawn a, a tam thei ang berin WEP ah hian registration lo ti se kan duh, a ti.
Pu Lalmalsawma Pachuau, Secretary, Planning chuan kal khawmte lawmna thu a sawi a, Pu Lalnghinglova Hmar, Minister, LESDE, Pu Khilli Ram Meena, IAS, Chief Secretary leh Pi Anna Roy, Principal Economic Adviser leh Mission Director, WEP, Rini Ralte, Founder, Label Lelen ten thu an sawi bawk.
