08 Jan 2024: Vawiin khan Tripura khawpui Agartala-ah India hmarchhaka RNU (Regional News Unit) hotute leh Akashvani PTC (Part Time Correspondent) te tan awmze nei lehzuala chanchinthar puandarh a nih theih nan “Content Synergy Workshop of Akashvani for Capacity Building” tih thupui hmangin ni khat awh Workshop buatsaih a ni a, he hun hi Dr.Vasudha Gupta Principal Director General (News & Akashvani) New Delhi chuan Khuallian niin a hmanpui.
Principal DG chuan hmarchhak Akashvani hotute leh PTC te tana Workshop buatsaih a ni chu lawmawm a tih thu sawiin Workshop a kalte chu an mahni State/District ah țheuh țhnahnem ngai taka mipuiten chanchin thar dik leh rintlak an hriat theihna tura thawk turin a fuih a, Social Media thu lengvela innghat mai lovin an vela thil thlengte chu a chhan leh a vang chiang taka hriat tum turte leh an mahni State RNU ah țheuh chanchin thar dik leh țhahnem zawk thawn țhin turin a fuih a, Lok Sabha MP General Election lo awm tur atan nasa zawka inbuatsaih tura fuihin Media mite pawimawhna a tarlang bawk.
Heng bakah hian Power Point Presentation hmangin mithiamten zirtirna an pe a, PTC ten zawhna an neihte zawtin nilengin hun hlawkthlak tak an hmang.
Vawiin Workshop ah hian Hmarchhak State hrang hranga RNU, Akashvani Hotute leh PTC te an kal țha hle a, Mizoram atangin Pu DR Lalropuia, DE/ HOO, Pu Gin Gangte, Asst.Director (News), Samuel Z.Hrangte, Programme Executive, Akashvani Aizawl te bakah Lalhlupuia Champhai, C.Lalhminghlua Serchhip, Thanghmingliana Renthlei Lunglei, RD Darthanzauva Mamit leh C Rammawizuala Saitual District PTC te an tel a ni.
