22 March 2024: Vawiin khan Rural Watsan Division, PHED Lunglei buatsaih “Water For Peace” tih thupuia hmangin PHED Conference Hall Lungleiah World Water Day 2024 puala hun hman a ni a, Er.K.Zohmingliana S.E, PHED Lunglei Circle chuan a kaihruai a ni.
He hun hmanpuitu leh khuallian ni bawk Lunglei Bawrhsap Pi Ramdinliani IAS chuan thu sawiin, indopui pathumna a chhuak anih chuan ‘tui vang a ni ang’ tiin mithiamte chuan an lo sawi thin a, khawvel hmun hrang hrang leh India ram hmun tam takah pawh tui vanga innghirnghona a thleng fo a mahni ram leh khuaa tui awm humhalh pawh kan tina hle a ni tiin, Lunglei District phei chu India rama tui harsatna District 75 an thlanchhuah zingah kan tel a ni, a ti.
DC chuan, tui kan renchem hian kan humhalh nghal tih kan hriat a tul, a ti a, ruahtui dahkhawlna tha zawk nei tura chhungkaw tinten tan lak a pawimawh hle a ni tiin, Public building Biak In leh Hall ah te phei chuan ruahtui tam zawk dahkhawl theihna siam ngei ngei tur a ni a, hei hi LMC hmalakna turah pawh an ngaihpawimawh zingah a tel a ni, a ti.
Hei bakah hian Company-te’n kawng an laih avanga vantlang tuihna an tihchhiat khuate chuan Dist thuneitute hnenah Complaint thehluh nachang hria se a duh thu Pi Ramdinliani Lunglei D.C chuan a sawi bawk.
Vawiina World Water Day Lungleia hmannaah hian tuihna humhalh kawnga hma la tha Mualthuam North, Buarpui leh Thaizawl khuate bakah mimal anga hma la tha Sairep VCP Pi Lalawmpuii hnenah lawmman pek an ni.
