26 Aug 2024: Vawiin chawhma khan Commerce & Industries Minister Pu F.Rodingliana chuan McCabe Hall, Aijal Club-ah UNNATI 2024 – India hmarchhak state-te ah industry hmanga economy hmasawnna chak zawk a thlen theih nana hmalakna Mizoram tan a tlangzarh. Unnati 2024 chungchangah inzirtirna leh inhrilhhriatna neih nghal a ni.
Minister Pu F. Rodingliana chuan State sorkar-in Handholding Policy a kalpui mek leh tunhnai lawka Strategic Investment Plan hnuaia MSME Elevate Mizoram (MEMiz) Scheme a siam leh hmalakna dangte nen a remchan dan ang zela inzarzawmin, industry neitute tan hmasawnna tha tak a thlen a beisei thu a sawi a. Tun hma lamah Mizorama industry neitute zingah an eizawnna bultan leh tihhmasawnna tur loan an pukte chu a nihna tur a hmang lo te, rul thalo te an lo awm thin thu leh chu chuan industry thanna tur a tihthuanawp thu a sawi a. Tun hnuah chuan hmasawn a hlawhtling tak tak duhte tan sorkar chuan theihtawp a chhuah tur thu sawiin Handholding Policy hmanga industry tihhmasawn a nih dan tur te a sawifiah a ni.
Minister Pu F. Rodingliana chuan Sorkar hna chu ‘public service’ a nih angin handholding policy leh policy dang dangte chu tangkai thei ang bera chhawr anih nan official-te pawh inhawng takin kalpui turin a chah bawk.
Vawiin UNNATI scheme tlangzarhna hi Pi Maria C.T. Zuali, Commerce & Industries Director chuan kaihruaiin, Health Care (Hospitals/ Diagnostic Centres, etc.), Food & Beverages (Horticulture, Agriculture, Food Entrepreneurs, etc.), Tourism Sector (Hotels/ Home Stays) leh Education (LESDE/ Vocational & Digital/IT & ITES) ah te inhrilhhriatna neih a ni.
