11 Oct 2024: Mizoram Journalist Association leh Mizoram Police tangkawp te’n vawiin chawhma dar 11:00 khan Lunglei Press Club-ah internet kal tlanga pawi khawihna leh dan bawhchhiatna chungchang zirhona, “Seminar on Cyber Crime” an buatsaih a, Lunglei HPC Vice Chairman Pu V.Malsawmtluanga MLA chu khuallian a ni a, Lunglei SP Pu J.Lalmuankima’n a telpui bawk.
Seminar hi Pu Lalrambuatsaiha, MJA General Hqrs President-in a kaihruaia, Pu Laltlanthanga MJA Dist Hqrs Lunglei President chuan kalkhawmte lawmna thu a sawi.
Khuallian Pu V.Malsawmtluanga chuan Cyber Crime chu tunlai khawvelah mitinin kan tuar a, Zoram kilkhawr berah pawh kan tuar nasa hle a ni tiin, a bik takin Politician-te phei chu a tuar nasa zing a mi an ni a ti. Thudik tawklo leh dik ziktluak lo te dawt hmanga inchirhthehna vangtein mi tam takin harsatna leh hmingchhiatna an tawk thin tih sawiin, hetiang kawngah hian dan kengkawhtute pawhin huaisen taka hrem ngai chu hrem ngam tura an insan mar a tul hle Pu Malsawmtluanga chuan a ti a, tunlai khawvelah Journalist-te chu mipuite rintlak thu puangzartu nia ngaih an nih laia Journalist te thupuan chhuah ngaichang lo va Social media a thu diklo leh dawt thehdarh hi a Kristian lovin zonun zemawi ti hmelhemtu leh Pathian pawi sawina lian tak a ni tih kan hriat angai a, Cyber Crime chungchang zirhona a telte pawhin a taka hmang tangkaitu nih tum turin a chah a ni.
Vawiina Cyber Crime Seminar Lungleia neihah hian Lunglei Dist MJA member-te bakah Police Department leh tlawmngai Pawl aiawhte telin MJA General Hqrs hruaitu engemawzatin an telpui bawk. Pu M.S.Dawngliana, Inspector Mizoram Police Cyber Crime Cell chuan Cyber Crime awmzia leh a kaihhnàwiha pawih khawih leh inbum theih dan hrang hrangte leh a hremna awm theih dan te, inven dan turte a zirtira zawhna leh chhanna hun hman a ni bawk.
