I&PR Dept. Addl. Secretary-in Mizo Journalist-te chu National TV leh Paper-ah tan la turin a chah
March 26, 2024: Vawiinah Mizoram Journalists’ Association (MJA) te chuan Directorate of Information & Public Relation, Lianchhiari Run Conference Hall, Aizawl-ah MJA General Conference vawi 50-na an hmang.
MJA General Hqrs Vice President Pu Lalremsiama kaihhruaina hnuaia hun hmanah hian I&PR Dept. Addl. Secretary Pi Betsy Zothanpari Sailo chu khuallian niin media a pawimawh tulh tulh tih a sawi a, Social, electronic leh print media te avangin khawvel thilte an hriat zung zung theih thu sawiin, media pawimawhna chu mipuite’n an hriat chian thu leh news rintlak, belhchian dawl a pawimawh thu a sawi bawk.
Khuallian chuan media-a thawh chuan politics lamah side nei lova report ziah a pawimawh thu sawi bawkin, Mizo Journalist-te chu National TV leh Paper-ah tan la turin a chah bawk a ni.
He hunah hian General Report leh Financial Report te ngaihthlak a nih bakah kum 2023 inkhawmpui leh kumin inkhawmpui inkara MJA member boral mi pahnihte sunna hun hman a ni bawk a, MJA President Pu C. Lalrambuatsaiha chuan investigative jounalism lamah tan lak a ngaih thu leh, thahnem an ngaih zual a tul thu a sawi a, kum tharah nasa zawkin hma la turin member-te a sawm bawk.
MJA General Conference 2024-ah hian kum 2024-2026 MJA General Hqrs. hruaitu thar tur thlanna neih nghal a ni a, Office Bearer 3 leh Member 11 thlan an ni a, he thu buatsaih lai hian result hriat hman a la ni lo. Rorel inkhawm neih ni bawkin ‘Approval of Reports’, leh Agenda 11 a lut a, Official Resolution 2 an sawiho bawk a ni.
Tun dinhmunah Mizoram pumah MJA member hi 192 an awm mek a, Aizawlah 91 awmin Lunglei-ah member 20 an awm a, Siaha-ah 12 awmin Champhai-ah 17 an awm a, Kolasib-ah 14 awmin Serchhip-ah 14 an awm a, Lawngtlai-ah member 10 awmin Mamit-ah member 8 leh Hnahthial-ah member 6 an awm a, I&PR Department-in Mizoram Press Accreditation list a siamah Accredited Journalist’s mi 142 an awm mek a ni.
