Tun tumah hian Mizote zingah kan hmelhriat, TV leh Chanchinbu leh Social Media lama anmahni kan hmuh fo te lehkha chhiar dan kan sawi dawn a. Kumin 2023 chhunga lehkhabu an chhiar tawh zat te kan zawt a; heng kan tarlan bak te pawh hi zawhna kan zawh erawh a chhanna kan dawn loh avangin kan tarlang thei lo a. Hei hi chona angah ngaiin, lehkha chhiar kan tam deuh deuh theihna tura tih a ni tih kan hre dawn nia.
Hmeichhe lam
‘I TI THEI’ tih lehkhabu ziaktu PC.Lalremruati (Mapuii Pachuau) hi kan hre vek àwm e; a lehkhabu pawh hi bu 10,000 zet a hralh a nih kha. Amah hi nu a ni tawh a, DDK Aizawl-ah Chanchinthar puangin ama tawkah a buai hle ang tih kan hrethiam àwm e. Chuti chung chuan kumin kum kal mekah hian lehkhabu sawm aia tam a chhiar tawh a; a lehkhabu chhiar ho hi phek 300 – 500 te an ni hlawm.
“A tam thei ang ber chhiar ka tum a; ka hun a indaih thei ngang lo!” tiin inthlahrung takin a sawi.
TV leh YouTube lamah kan hmuh fo thin, DDK Aizawl lamah te pawh midangte kawm thiam em em Janis Hnamte hian kumin kum kal mekah hian lehkhabu pasarih vel a chhiar zawh tawh thu a sawi a. Ani pawh hi nu ni tawhin a buai hle ang tih kan hre àwm e; chuti chunga heti zat lehkhabu a chhiar zo tawh hi a ngaihsanawm hle.
“Nikum lam khan lehkhabu 30 – 40 ka chhiar chhuak a, kumin chu Pathian zarah kal chhuahna tur ka neih neuh neuh avangin lehkhabu hi 7 vel chiah ka la chhiar a. Bible hi a vawi 4-na atan chhiar zawh ka duh avangin lehkhabu dang hi ka chhiar tam hman ta lo a, kumin ka pianchampha June ni 30-ah khan Bible hi ka chhiar zo,” tiin a sawi.
Mizo Idol judge ni tawh leh Vohbik lam atanga kan hmelhriat em em Vari Varte hian kumin chhungin lehkhabu pathum a chhiar tawh thu a sawi a. Amah hi Hrangbana College (Aizawl)-a thawk a nih avangin a buai hle ang tih a rin theih a, a entawntlak hle.
Tun Mizoram khawvela hmeichhe zaithiam kan neih that em em, aw mawi danglam tak nei Cindy Lalthanpuii hian lehkhabu pakhat a chhiar zawh tawh thu leh Bible a chhiar mek thu a sawi bawk.
Mipa lam
Vawiin Mizoram khawvela thawnthubu ziak thiam em em mai, MAL Book of The Year lawmman vawi-hnih lo dawng tawh C.Lalnunchanga (Taitea) chuan kumin chhung hian lekhabu sawmthum aia tam a chhiar tawh thu a sawi a.
“Lehkhabu thar ka chhiar tam lo. F.Vanlalrochana ziah ‘Zofate u, finna zawng ula’ tih ka chhiar a; C.Vanlallawma ziah ‘Hringlang tlang’ ka chhiar a; K.Vanlalauva lehkhabu ka chhiar a; JH.Lalrinzuala ziah ‘Sekawtrawlh’ ka chhiar a; a bak chu lehkhabu hlui ka chhiar nawn thuak thuak a. Bu 30 ai chuan a tam ang,” tiin a sawi bawk.
MAL Book of the Year lawmman vawi-hnih lo dawng thei khawpa thuziak thiam Lalhruaitluanga Chawngte hi kan hre vek àwm e. Ani hian kumin chhung hian lehkhabu hi 30 aia tam a chhiar tawh a.
“A zat tak hi ka lo chhinchhiah lo a, a then chu ka duh lai ka chhiar thuak thuak a, bu 30 aia tam fê chu a ni tawh ang,” tiin a sawi bawk. Pa inngaitlawm tak a nih avang hian a sawi tha duh lo niin a lang.
Kum 2009-a MAL Book of the Year lawmman dawngtu, vawiin thlenga thawnthubu ngaihnawm tak tak la ziak reng peih Lalrammawia Ngente hian kumin chhungin lehkhabu sawmhnih aia tam a chhiar tawh thu a sawi a.
“Ka lehkhabu chhiar zat hi ka lo chhinchhiah hauh lo mai a, mahse bu 20 aia tam chu ka chhiar tawh,” tiin a sawi. Ani pawh hi Kohhran Upa a ni a, Gov’t Johnson College (Aizawl)-ah zirtirtu a ni a, chuti chunga heti zat lehkhabu a chhiar thei hi a entawntlak hle.
Vanglaini columnist, a lehkhabu te pawh chhiar hlawh em em F.Vanlalrochana hian kumin kum kal mekah hian lehkhabu sawmruk a chhiar tawh thu a sawi bawk. Ani hi chu a thuziah atang pawhin lehkha a chhiar nasa tih kan hre thei àwm e.
Social Media lama infiamna chanchinthar kan enna ber inkhel.com enkawltu Muantea Chinzah hian kuminah hian lehkhabu 15 a chhiar tawh bawk.
“Kuminah hian lehkhabu 30 chhiar ka tum a, bu 15 ka chhiar zo tawh a, bu 2 chhiar lai mek ka nei bawk,” a ti.
R.Lalvena IAS, tuna Chennai-a awm mek hian kuminah hian lehkhabu sawmpariat a chhiar zo tawh bawk.
“Kumin chu ka buai a, lehkhabu ka chhiar hman lo lutuk a, bu 18 ka chhiar tawh a. Kum 2020 vel atangin lehkhabu hi kum tin bu 30 – 40 vel ka chhiar tlangpui,” tiin a sawi.
Mizo Gospel hla sa thin One in Christ hotupa Alvin Lalruatfela hian kuminah lehkhabu pakhat a chhiar tur a chah thlen thu a sawi a.
“Kuminah hian lehkhabu ka lo la chhiar mumal hauh lo mai a; tunah hian ka chah mek chu a lo thleng tep a. A tam thei ang ber chhiar ka tum ang,” tiin a sawi bawk.
Mihring kan buai tawh a, lehkha chhiar hman lo tam tak kan awm tawh a, kan MLA ni mek pakhat pawhin lehkhabu a chhiar hman tawh loh thu a sawi a. Chuvangin lehkhabu pakhat chauh chhiar chhuak nih pawh hi a zahthlak loh a, kan han tarlang tel a ni e. Kan tarlan tak te hian Social Media lamah te pawh an lehkhabu chhiar hi an tarlang fo tih kan hria ang a, an ngaihsanawm hle.
Mizo te zinga chuai thei tawh lo tur Ngurthangvela thusawi hmang hian a tawp khar ta ila —
“Kuminah hian lehkhabu 50 aia tam ka chhiar tawh a, Bible vawi 2 ka chhiar chhuak tawh bawk. WhatsApp leh Social Media-a thu belhchian dawl lo mai mai chhiar lo-in lehkhabu hi chhiar ila. Miin hah taka lehkhabu an ziah lo chhiar ve hi kan bat a ni tih i hria ang u.”
