11 June 2024: Vawiin khan ‘I nunna atan thing phun rawh’ (Plant Trees for your Life) tih thupui hmangin Mizoram pumpuiah Green Mizoram Day hman a ni. A hmanna pui ber chu Multipurpose Cultural Complex Auditorium, Aizawl Berawtlang-ah hman a ni. He hunah hian AH & Vety minister Pu C.Lalsawivunga chu khuallian niin, Assembly Speaker Pu Lalbiakzama pawhin a hmanpui a, he ni denchhen hian Zokhawsang, Assam Rifles Complex-ah thing phunna hun ‘Ceremonial Planting’ an hmang bawk.
Khuallian Pu C. Lalsawivunga chuan, Green Mizoram Day chu Green Aizawl Day a bultan niin, Mizoram pum huap hmalakna anih theih nana 1999 atangin Green Mizoram Day tia thlak a hman thin tak a nih thu a sawi a, kum 2014 ah khan Mizoram sawrkarin June ni 11 hi “Green Mizoram Day” ah a puang tih a sawi a. Green Mizoram Day puala thing tiak phun runpui buatsaih a ni thin chu lawmawm a tih thu sawiin, awmze nei lehzual zawka thing phun a tul a tih thu a sawi a, a hmun a zira tuihna siam thei chi leh rah tlan chi thing phun tura ruahman a that thu sawiin Green Mizoram Day hmang tura sawrkar department hrang hrang leh tlawmngai pawl hrang hrang te, ramngaw leh nungcha humhalhtu pawl hrang hrangte thawhhona chu chhuanawm a tih thu a sawi bawk.
Assembly Speaker Pu Lalbiakzama pawhin thu sawiin mihringte kan damkhawchhuahna tur hian ramngaw tha leh nungcha te nen kan inmamawh tawn reng avangin dimdawi leh zah thiam taka kan humhalh an ngai a ni a ti a.Mizoramah ramngaw kan ngah kan tih rualin ramngaw tha leh bit chu kan nei tlem tawh hle tih sawiin ramngaw kan neih sa humhalh bakah ramngaw tha siam turin nasa lehzuala tan kan lak a hun takzet a ni a ti bawk.
Khuallian chuan Kangmei ven kawnga ti tha zual, district pathum hnenah lawmman a sem a, chungte chu-
1-na Kolasib District
2-na Lawngtlai District
3-na Mamit District Pu M.Z. Singson CF(CC) chuan report pe in, Green Mizoram Day hman tan 1999 atanga 2023 thleng khan thing tiak 45,63,326 phun a ni tawh a. Kum 2013 atang khan thingphun te a nung zui em tih chhinchhiah tan a ni.
