30 April 2025: MZP Hqrs Lunglei chuan ATL Road siamna tur sum pawhpen dah let phuta kawngpui an dan chu a nithumna atan an chhunzawm.
Tarlan tawh angin MZP Hqrs Lunglei leh an hmalakna thlawptu pawl hrang hrang 20 chuangte chuan Pukpui daia ATL Road an dan leh Hrangchalkawn lama nimin atanga kawng an dan chu Sawrkar lam atanga an beisei ang chhanna an la hmuh loh avangin an la chhunzawm zel.
Hrangchalkawn a nimin atanga kawng an dan chu remchan zawkna avangin nizan zanlai dar 1:00 atang khan Zobawk dai lamah kawng danna hmun sawnin, Zobawk daiah hian lirthei 100 chuang an dang chat mek. Heng lirthei te hi a tam ber chu bungraw phurte niin khualzin lirthei engemawzat an awm bawk.
Tun dinhmunah MZP leh Mizoram Sawrkar inkarah thuthar engmah hriat tur a la awm lo va, kawng hi engchen nge an dan dawn sawi theih a ni lo va, MZP hruaituten kan Palai an hrilh danin an thil phut Sawrkarin a tih hlawhtlin hma chuan Kawngpui dan hi chawlhsan mai mai an tum dawn biklo an ti.
