22 May 2025: Mizoram Truck Owners Association leh Mizoram Truck Drivers Association ngenna angin naktukah Buichali leh Sairang inkar kawng chhe zual lai hnawh that hna Contractor-te’n an thawk tan dawn a, Truck khalhtu leh neitute sawi danin kawng chhe zual lai siamthata tlan ngam anih chuan an tlan chhunzawm dawn tih an sawi.
Mizoram Truck Owners Association hotute sawi danin nimina PWD Minister Pu Vanlalhlana hova Buichali leh Sairang inkara kawng chhe zual lai an enfiahnaah Contractor-te chu kawng chhe zual lai thawm that hna thawk turin an ngen a, an ngenna angin Contractor-te’n thawh an inhuam angin naktuk atang hian an thawk tan dawn a, truck neitu leh khalhtute chuan naktuk chawhnu dar 2:00-ah kawng chhe zual lai an thawm that hi an enfiah tur thu leh an duh ang anih chuan an tlan chhunzawm dawn tih an sawi a ni.
MTOA Secretary Pu Dina Tlau chuan Truck neituten chak zawka kawngpui siam a nih theih nan kawng siam chhung, zing dar 9:00 atanga tlai dar 5:00 thleng lirthei din tir an inhuam thu an sawi bawk.
Nimin khan PWD Minister Pu Vanlalhlana chuan Buichali leh Sairang inkara kawng chhe zual lai an enfiahnaah National Highway 06 chu Mizoram chak lakna kawngpui pawimawh berte zinga mi anih angin, engtik lai pawha lirthei zawh tlaka siam a tul thu a sawi a, NHIDCL hotute chu mipui, a bikin lirthei hmanga eizawngten harsatna an tawh dante hrilhfiahin, tun aia chak lehzuala kawng siam hna kalpui turin a chah a ni. (AIR Aizawl)
