02 Sept 2025: INTACH Mizoram Chapter chuan tun hnai khan Mizoram hmarlam Khawlek khuaa Puk hmuhchhuah atangin mihring ruhro, kum 700 chuanga upa tawh hmuhchhuah a ni tih an sawi.
Indian National Trust for Art and Cultural Heritage-INTACH, Mizoram Chapter-te’n vawiina Aizawl Press Club a thuthar thehdarh tute an kawmnaah an Convener Pu Rin Sanga, IAS (Retd) chuan ruhro hmuhchhuahna, Vanbawng leh Khawlek inkar Saitual District kham koa Thingkhuang ngaw Pûk hi Pu Laltlanhlua, Khawlek-in January ni 11, 2025-a a hmuhchhuah a ni tih a sawi a. N.Khawlek khawtlang hotute’n an ngen angin INTACH, Mizoram Chapter chuan Art & Culture Department thawhpuiin May ni 2, 2025 khan enchiangin mihring luruh 9 leh mihring taksa bung ruhro hrang hrang a awm tih an finfiah a ti a, ruhro hi engtik hunlai ami nge tih zirchiang turin ‘sample’ ṭhenkhat chu Beta Analytic, Miama, Florida, USA-ah Carbon-14 dating tih tir tura thawn niin, zirchian a nih hnuah heng ruhro te hi kum 1260 AD aṭanga kum 1320 AD inkar ami an ni tih a sawi a, heng ruhro te hi hnam ziarang leh nunphung mai bakah hnam chanchin zirchianna atana hmanraw ṭangkai tak a nih tur thu a sawi bawk a ni.
INTACH, Mizoram Chapter hotute chuan heng ruhro te hi tute nge an ni tih leh eng hnam nge an ni tih zirchian zel a nih theih nan mithiam bikte sawmin DNA Analysis kalpui tum a ni tih an sawi bawk. (DD)
