Khuh damdawi hmansual hluar lutuk chungchang sawiho

06 Oct 2026: Health Minister Pi Lalrinpuii leh Excise & Narcotics Minister Pu Lalnghinglova Hmar kaihhruaina hnuaiah Mizorama khuh damdawi hmansualna lo hluar ta lutuk chungchang sawihona ‘Inter-Ministerial Meeting’pawimawh tak chu nimin tlai dar 5:30 pm khan SAD Conference Hall, MINECO-ah Health Department hotute, Excise & Narcotics Department hotute leh Central YMA hotute’n an nei.

Ruihhlo hlauhawm leh buaipui awm bera ngaih heroin a van chhoh tak deuh avangin mi tamtak chu damdawi (pharmaceutical drugs) ruih theih lamah an tlan tih sawi a ni a, damdawi ruih nana hman sual theih thahnem tak man a nih tawh thu te, damdawi zuar licence neitu ngei pawh an damdawi lak luh leh zawrh dan fello avanga mi engemaw zat man leh court-a thubuai siam sak an awm tawh thu sawilan a ni bawk.

Codeine Syrup hi damdawi hman sual hluar ber a nih thu sawi niin, damdawi zuartuten Mizoramah an lalut tam hle a, doctor chawh chauhva hralh tur (prescription drugs) ni mah se, doctor chawh lohvin a luangral tam hle a, thalai rual leh mi pangngai tak tak, naupang chenin an hmang sual nasa hle tih tarlan a ni. Khuahkhirhna a nasat avangin damdawi dawr pangngaiah chuan mamawh tan pawh lei tur a vang hial tawh zawk a, amaherawhchu, a ruk a rala hralh a nasa hle si a, damdawi zuar thenkhatte bakah Medical Representative inti tamtak hetiang damdawi ringawt buaipui hi an tam hle tih sawi niin, Codeine Syrup bakah ruih theih chi hrang hrangte hian Mizoram hmun kilkhawr ber thlengin a thleng deuh vek tih sawilan a ni bawk.

Mi thenkhatte thiltih pawi tak, Codeine Syrup ni reng si damdawi dang daih anga lantir nana damdawi label dang daih bel, damdawi bur engemaw zat man a nih thu tarlan a ni bawk. Hei hi phailama tute emaw thurualpui neite thil tih niin, heng damdawi zawrh kawnga inhnamhnawihna nei mi engemaw zat man an ni tawh a, a siamtu ngei manchhuah dan tur sawi ho niin, Excise & Narcotics Department-in ngawrh takin investigation an kalpui mek chu lo bawhzui zel se, FDA leh Central YMA pawhin an hmabak lo bawhzui zel se tih a ni.

Dan lova damdawi ruih theih theh darh thintute dapchhuahna kawngah thawhhona tha zawk neih dan tur sawi ho a ni a, thawhhona tha tak hnuaiah chuan kan rama damdawi hmansualna pawi tak hi tihreh theih beiseina lian tak meeting chuan a nei a ni. Tin, hun remchang hmasaah Minister pahnihte kaihhruaina bawkin tun tum meeting member-te bakah Mizoram Chemists & Druggists Association, Mizoram Medical Representative Association leh Mobile Drugs Dealers Association tela meeting neih leh nise tih rel a ni bawk.

Health Minister Pi Lalrinpuii chuan damdawi ruihtheih hmansual dona kawnga Excise & Narcotics Department leh Central YMA te thawhrimna fakin thahnem ngai taka thawk zel turin a fuih a. Sawrkarin rintlakah ngaia drugs licence a pekte zingah mi rinawm lo, damdawi ruih theih sum siam nan chauhva hmang thinte chu manchhuah an nihin, an licence cancel sak zel a nih tur thu a sawi a. Health Minister chuan dan tha taka zawm tum lote licence chu sawrkarin tihtawp zel a hreh dawn lo tih sawiin, licence thar pek zel kawngah pawh sawrkar fimkhur takin a kal a ni tih a sawi bawk. (DIPR)