23 Feb 2024: Vawiin khan Raj Bhawan-ah Pu K.Vanlalvena, MP (RS) leh Dr. Hari Babu Kambhampati Mizoram Governor te chu inkawmin, Pu K.Vanlalvena chuan Kaladan Multi-modal Transit Transport Project (KMTTP) kawng sial mek chungchanga harsatna awmte sutkianpui turin a ngen.
Meeting-ah hian Pu K.Vanlalvena chuan KMTTP sial mek chungchanga harsatna hrang hrang Contractor chungchang te, Security leh lei (bridge) chungchangte sawipuiin an harsatna tawh te chu Governor a nihna angin External Ministry, Home Ministry leh Ministry of Road Transport and Highways (MoRTH) Government of India a thlen turin a ngen.
Mizoram Governor hian harsatna thlente tha taka lo dawngsawngin Delhi-a a zin leh hmasak berah theihtawpa hmalak a tum thu a sawi a ni.
Meeting-ah hian KMTTP chu Act East Policy hnuaia insumdawnna kalkawng pawimawh tak anih thu sawiin, hmanlai insumdawnna kalkawng (Silk Road) tharthawh leh theih an beisei thu tarlan a ni bawk. Pu K.Vanlalvena hi Ex- CM Pu Zoramthanga OSD thin Pu Rosangzuala chuan a tawiawm a ni.
