“Kristian MP leh Tribal MP te NDA lamah kan thut luih loh chuan tun ai hian min nêkchêp dawn” – MNF Party Lok Sabha Candidate Pu K.Vanlalvena
08 April 2024: Tukin khan MNF Party Vice-President Dr R.Lalthangliana leh MNF Party-te Lok Sabha MP candidate Pu K.Vanlalvena, Rajya Sabha MP ni mekte chuan Lunglei Press Club-ah thuthar thehdarhtute an kawm.
MNF Vice-President Dr Thangtea chuan Lok Sabha MP Inthlan lo awm turah Pu Vena chu Rajya Sabha MP nilai candidate-a kan neih hmasak ber a ni, tiin, MNF ticket angin ding mahse Zofate huap candidate angin mipuite’n ngai se a duh thu leh vote hlu tak pe turin ka ngen a ni, a ti.
He hunah hian Pu Vena chuan MNF Party Nomination Committee-in Lok Sakha MP candidate atana an thlang chu Pathianin ram leh hnam rawngbawlna tura a ruatna-ah ngaia lawm taka a pawm thu sawiin, sum leh pai rinchhan tur a neihloh thu leh Pathian rinchhana penchhuak a nih thu a sawi a. Chhim lamah kawtchhuah pawimawh tak leh airport kan neih ngei ngei a ngai a ni, tiin, chutiang a nih theih nan MP pakhat tih theih a tam lova, mahse hotu lian a ti thei turte hnenah theih ang angin ka thlen thin a, MNF sawrkar lai khan Ariel Survey pawh neih niin, Vuakmual chu tha tura ngaiin kan lo hual hman, a ti a; tih theih tamlo mahse chhim lam hmasawnna turin ka theih ang angin hma ka la ve thin a ni a, ti.
MZU Southern Campus a puitlin theihna turin hotute hnung zuiin theih ang anga hma a lo lak thin tawh thu Pu Vena hian sawiin, a hlawhtlin ngei pawh a beisei thu a sawi a; Tlabung Kawrpuichhuah-ah Border Trade Centre din turin MNF sawrkar laia Commerce & Industries Minister Dr Thangtea hova nasa taka hma an lo lak tawh thu leh Parliament-ah pawh a lo auchhuahpui tawh tih tarlangin, Bangladesh lam atanga hmalakna a chak tawkloh avangin hmalakna a kal chaklo niin a sawi a; Saisihchhuah leh Zorinpui kaltlanga chhim lama kawtchhuah pawimawh a awm theih nana a hmalakna hrang hrangte a tarlang bawk.
Pu Vena chuan Rajya Sabha MP a nih chhungin NDA lamah a thut thu leh Parliament Session-a thu a sawi apiangin sawrkar lai khak zâwnga thu a sawi tam zawk thu a sawi a, tun inthlan lo awm turah pawh a tling a nih chuan NDA-a thut a tum thu sawiin, Hindu hlangin an duh ang angin rorelna an kalpui a hlauhawm avanga Kristian MP leh Tribal MP te NDA lamah kan thut luih loh chuan tun ai hian min nêkchêp dawn a, amaherawhchu kan thusawi leh duhdan te min zah sak lova an duh anga kal luih an tum tlat a nih chuan NDA chu engtiklai pawhin kan chhuahsan thei a ni, a ti a. Politics hmanga ram rawngbawl hna a thawhna kawngah a ngaihpawimawh ber erawh hmun hrang hranga Zofate insuihkhawm a ni, tiin, kan ram, kan hnam, kan sakhua a him theihna turin hnama chianglo MP kan thlang ang tih a hlauhawm hle a ni, a ti bawk.
