Kum 12 chhungin National Level Exam Paper 90 chuang a putru tawh an ti

25 June 2026: Vawiin chawhnu dar 1:00 khan Lunglei District Congress Committee hruaitute chuan LDCC President Room-ah thuthar thehdarhtute an kawm.

Thuthar thehdarhtute an kawmna hi Pu Joseph R.Lalremngheta, LDCC Vice President-in a kaihruaia tunhnaia India rama NEET Exam leh CBSE Exam chungchanga buaina awm fo avanga AICC-in District tinah Press mite thil awmzia sawipui tura an tih anga hun buatsaih an nih thu a sawi.

LDCC hruaitute chuan May ni 3 2026 a NEET exam chu zawhna putru avangin NTA-in a Cancel a, a tirah zilai 22,79,743-ten exam tura inziaklutin heta tang hian mi 22,00,5,035 (96.92%) in exam an hmachhawn a. Exam cancel anih hnuah June ni 21 khan mi Nuai 20 velin exam an hmachhawn leh a ni an ti.

Exam hian zirlaite hma hun a hril a chuvangin, zirlaiten exam bei turin nasa takin tha leh zung bakah sum leh pai tam tak an seng thin a. An insensona zawng zawng tih bawrhban a ni fo mai leh zawhna putru sum tam tak senga hralh thin a ni chunga Central Sawrkarin hmalakna mumal a neilo chu Congress Party chuan a dem hle a; thalaite hmakhua an ngailo hle a ni an ti.

LDCC hruaitute chuan NEET 2026 Exam-ah khan zawhna Paper chu tute emawin ru chhuakin Whatsapp-ah leh Telegram-ah Rs Sang 5 atanga Sing 3 inkarin an hralh niin an sawi a, Rajasthan-ah phei chuan Rs Nuai 3 thlengin an hralh an ti.

Kum 12 chhungin National Level Exam 23-ah Paper putru thleng tawhin a vaiin Exam Paper 90 chuang a putru tawh an ti. Hei bakah hian CBSE hnuaia exam-ah mark pek dan felhlel avangin zirlai tam takin tuar tawhin an thawhrimna a thlawn zing tawh hle a, hetianga India rama zirlai thawkrim tak takte an thawhrimna a thlawna siam a ni thin leh zirlaite hmakhua ngailo taka Central-a BJP Sawrkar a awm reng chu demawm an tih thu bakah Central-a Education Minister Darmendra Pradan chu mawhphurhna la a bang ngam turin Congress Party chuan a duh a ni an ti.

LDCC hruaitute hian tunlaia Lungleia HPC Cup ropui taka khelh mek chu lawmawm an tih thu leh kum 2011 atanga Congress Sawrkarin bul a lo tan leh Grass a lo phah te tha taka chhunzawm zel a ni chu lawmawm an tih thu an sawi bawk.

Vawiina LDCC hruaituten thuthar thehdrahtute an kawmnaah hian Vice President Pu Joseph.R.Lalremngheta bakah Treasurer Pu Eric R.Zomuanpuia, LDYCC President Pu Moses Lalrinchhana te bakah Party hruaitu thenkhatte an tel a ni.