01 July 2024: Loan tihchingpen vanga Court-in thiam loh a chan tir, SBI branch manager thin, Pu Lalkhomang Guite leh Sacred Heart Society neitu Pu Gary T.Haokip-te chu kum 4 chhung lung in tang tur leh Rs Nuai 10 chawi tura hrem an ni.
Special Judge, Prevention of Corruption Act, Mizoram chuan heng mite hi kar kalta June ni 28 khan thiam loh a lo chan tir tawh a, he thubuaiah hian November, 2006 leh October, 2007 chhunga khatih laia State Bank of India, Mission Veng Branch, Aizawl-a Branch Manager ni thin Pu Lalkhomang Guite leh a thurualpui Sacred Heart Society neitu Pu Gary T.Haokip te leh an thurualpui nia puh midangte chu Self Help Group hrang hrang hminga loan pekchhuah leh chuta tanga sumpai lo eiru ah puh an ni.
Court chuan Pu Lalkhomang Guite leh a thurualpui Pu Gary T.Haokip-te chu thiamloh chan tirin, vawiin khan a hremna a puang a, court chuan an pahnih hian kum 4 chhung ve ve lungin tang tur leh Rs Nuai 10 ve ve chawi turin a hrem ta a ni. (DD)
