14 June 2024: Mizoram State AIDS Control Society (MSACS) leh Association for Voluntary Blood Donation (AVBD) te buatsaihin vawiin khan Vanapa Hall-ah World Blood Donor Day, 2024 hman a ni a. Health & Family Welfare Minister Pi Lalrinpuii chu khuallian a ni.
Khuallian Pi Lalrinpuii chuan Zoram mipuite World Blood Donor Day chibai bukin, damlo thisen mamawhtuten an hman tur anmahni taksa ami ngei sawr chhuaka midangte tana an thisen hlu tak hlan thin tute chu Mizoram mipuiten zahna chibai kan buk thar leh che u a ni a ti a, anmahni vangin kan thla a muang a, nunna tam tak chhanchhuaktu an ni a, thi mai tura ding tawh ten lei lai rap lehin khawvel hi a tharin an hmachhawn ve leh mek a ni tih kan hre thar fo thin a ni a ti a. Thisen thianghlim kan neih zel theih nan leh midangte tana kan luanchhuah zel theih nan kan nunphung tih hrisel nachang i hre deuh deuh ang u, tiin mipuite a sawm a ni.
Kum 2023 April – March 2024 inkar hian thisen unit 35619 Mizoram pumah pek a ni a. Mahni duhthu ngei a thisen pek (Voluntary Blood Donation) hi Unit 32493 a ni a, VBD % hi 91.22% niin blood donation camp vawi 585 neih a ni.
Mizoramah kum 1993 atang khan thisen pek zat record siam tan a ni a, kum 1993 hian thisen pek zawng zawng chu unit 3119 niin, heng zinga Voluntary a pek chu unit 56 (1.80%) a ni.
World Blood Donor Day hi Blood Group ABO hmuchhuaktu Karl Landsteiner-a 14th June 1868 a pian champhaphak pualin khawvel hmun hrang hrangah kumtin hman thin a ni a. Kum 2004 atang khan India ramah hman tan niin, World Blood Donor Day hi WHO a member 192 awmna chuan May, 2005 a 58th World Health Assembly ah official in kumtin-in Thisen pe thin tute hnena lawmthu sawina pual atan hman turin a rel a ni. Mizoramah pawh kum 2007 atang khan hman tan a ni.
World Blood Donor Day programme hi Dr Eric zomawia, Mission Director, NHM-in a kaihruai a. Dr. Lalthlengliani, Project Director, MSACS in World Blood Donor Day chungchang leh a thlawna thisen pek kawnga Mizoram dinhmun leh hmalakna tlangpui report a pe a ni.
