26 Sept 2024: Tukin khan Home Minister Pu K.Sapdanga chuan Champhai Superintendent of Police pisa a tlawh a, Champhai District Executive Force (DEF) hotute nen an inkawm.
He hunah hian Pu K. Sapdanga chuan Mizoram sawrkarin ruihhlo leh kuhva tawlh ruk dona kawngah theihtawp a chhuah tih a sawi a. Kumin 2024 August thla thleng khan ruihhlo Rs vaibelchhe 160 man hu man a ni tawh a, a kaihhnawihah mi 355 man an ni tawh tih a tarlang. Sawrkarin ruihhlo leh dan phal loh thil dang te a dona kawngah Mizoram Police te hnathawh a chhuan thu pawh sawiin Home Minister chuan Sawrkar innghahna an nih angin Police-te chu thawkrim zel turin a fuih a. An hnathawhte beiseina sang tak nen an lo thlir zel dawn tih a sawi bawk a ni.
He hunah hian Champhai Addl SP Pu Lalmalsawma Hnamte chuan Champhai District chhunga venhimna hna an thawh dan a sawifiah a. Champhai District-ah hian Police Station pathum – Champhai, Zokhawthar leh Dungtlang PS te a awm a, Hnahlan leh Farkawnah Beat Post a awm bawk a ni. District Executive Force te bakah hian Assam Rifles (2nd leh 42nd Battalion) te chu hmun pasarihah inkhuarin venhimna an kalpui mek a. Champhai Police hotute hian Ruihhlo leh dan phal loh thil dona kawnga hma an lak dan te, an hmachhawp te leh an mamawhte chu Home Minister hnenah hian an thlen bawk a ni.
