Kumin sawrkar kum kal meka LPG trip 230 endik tawhah Gas buk tling lo bur 40 an man tawh

12 Aug 2026: Pu R.Lalnghakliana, Assistant Controller Legal Metrology Department, Lunglei chuan vawiin chawhnu dar 2:00 khan a Office-ah MJA Lunglei member-te kawmin an hmalakna hrang hrang a hrilh.

Pu R.Lalnghakliana chuan kum 2025-2026 Financial Year chhungin Petrol trip 443 leh Diesel trip 454 an endik tih sawiin, thil diklo hmuh an nei lova, LPG trip 472 an endik atangin Gas buk tling lo bur 50 motor 2 atangin an man thung.

Sawrkarah sum chhun luh tura tuk Rs Nuai 2, Sing 6 an neih laiin Rs Nuai 2, Sing 6, Sang 9, 625 an chhung lut.

Kumin Sawrkar kum kal mek July thla thlengin Petrol trip 261 leh Diesel trip 343 endik tawhin diklo a awm lova, LPG trip 230 an endik tawh atangin Gas buk tling lo bur 40 motor 3 atangin an man tawh a ti.

Asst. Controller chuan Lungleiah Vawksa buk a tling tha tawh viau nia an hriat thu a sawi a, a khat tawkin an endik thin bakah dawr hrang hranga bukna te leh MRP an hman dik leh dikloh te an endik thin bawk tih sawiin man zeuh zeuh pawh an nei niin a sawi.

Zawhna chhangin, Petrol Pump neituten an pump khawl an khawih danglam thei niawma sawi chu, an Department-in an endik vek hnuah an seal vek bakah password siam avangin khawih danglam mai mai theih a ni lo a ti.

Buk tling lo leh MRP hman loh bakah an Department kaihhnawih chi hrang hrangah mipuite chu phun lungawi mai lova report thin turin a ngen a, report kher loh pawh social media lama pholan an hmuh chuan a theih ang anga an umzui thin thu leh umzui zel an tum thu Pu R.Lalnghakliana chuan a sawi bawk.

Assistant Controller hi a thawhpui thenkhatten an tawiawm a ni.