23 April 2024: Kuminah ni 100 chhungin ruihhlo hman sual avangin Mizoramah mi 27 an thi tawh.
Excise and Narcotics department-in an chhinchhiah danin kumin January ni 1 leh April ni 12 inkar chhung khan ruihhlo avangin Mizoramah hmeichhia 6 leh mipa 21 an thi leh hman tawh a. An zinga mi 18 hi heroin a inchiu thin an ni a, mi dang 9 chu heroin leh damdawi dang hman kawp vanga nunna chan an ni.
Kum 1984-a Excise and Narcotics department-in ruihhlo avanga nunna chan mipa pakhat, heroin hmang thin an chhinchhiah tan atangin tun thleng hian ruihhlo vanga thi hi mi 1,839 an awm tawh a, an zinga 1,616 hi mipa an ni a, hmeichhia 223 an awm tawh bawk. Ruihhlo vanga thi zinga mi 1,161 hi proxyvon leh parvon spa vanga thi an ni a, mi 427 chu damdawi dang hmang an ni a, heroin vanga thi hi mi 251 an awm a ni. Nikum khan damdawi hmansual avangin mi 76-in nunna an chan a, an zinga 64 hi mipa an ni a, 12 hi hmeichhia an ni. An vai hian heroin leh ruihhlo dang khawih pawlh vek an ni.
Mizoram hi Golden Triangle leh hmun dang ruihhlo siam chhuahna atanga Myanmar kaltlanga dan kalha ruihhlo tawlhna kawngpui ber pakhat a ni a. Kum 2021 February thlaa Myanmar-a mipui thlan sorkar paihthlaa sipaite’n thuneihna an hnehchhuh atang khan nasa takin ruihhlo tawlh ruk hi a pung a. Dan kengkawhtute’n ruihhlo an man thin pawh nasa taka pungin tum khata an man pawh a hlawm a lian hle a ni. (AIR)
