Kumthar inhlantharna leh thingpui ruai kilhona hun hmang

12 Jan 2026: Pu C.Lalhruaitluanga District Information Officer, Lunglei chuan vawiin chawhma dar 11:30 khan a Office Chamber-ah MJA Lunglei-te; DIPRO Lungleia thawktute nen kumthar inhlantharna leh thingpui inpuina hun a hmanpui.

Pu C.Lalhruaitluanga chuan Pathian hruaina avanga Lunglei MJA member-te leh IPRO Lungleia thawktute chhungkuaah nikum lamah harsatna liantham tawk an awm lo leh Kumthar damtlang taka an chuangkai thei chu lawmawm a tih thu a sawi. Kum 2025 chhungin MJA te leh Media hrang hrang te nen thawhhona tha tak an neih thin avangin PRO Pu Hruaitea chuan lawmthu sawiin, Department thawktute in daih tawklohna kawng hrang hrangah leh an tlin tawklohnaahte MJA member-te’n an hliahkhuh thin avanga lawmawm a tih thu a sawi bawk.

Kum 2026 kan hman turah hian Office a thawktute leh MJA-te mahni zawn theuhah theihtawp chhuaha kan mawhphurhna tha taka hlen chhuak turin inhlan thar ang u a ti.

Pu C.Lalhruaitluanga chuan Daily News Paper te chu regular zawka ti chhuak tura tan la turin a ngen a. Chanchinbu mite chu mahni ngei che chhuaka news siam thin a angai tiin, awm hmun atanga news lakkhawm ringawt chu a him tawk lo thei tih hriat a tul a, chuvangin kum 2026 kan hman kal mekah hiah mahni zawn theuhah hmasawn tum turin a fuih a ni.

DIPRO Lunglei Pu C.Lalhruaitluanga chuan Digital Media hman tangkai kawngah pawh kawng khat talin hmasawn theuh i tum ang u a ti bawk. Mipui sukthlek ti danglam thei leh Sawrkar khalh ngiltu kan la ni reng tih kan hriat a chutiang tur chuan kan insanmar angai a, a tul hunah sawrkar thawhpui thei; a tul hunah sawisel ngam nih a pawimawh a; kan thupui atan erawh mipui leh ram tan kan thawk tih hria ang u, a ti bawk.

MJA Lunglei District President Pu H.Lalthansanga pawhin thu sawiin, Social Media hrang hrangte’n an thu hriat apiang belchiang si lova an thehdarh vak vak lai hian keini chuan kan ti thiang ve lo; news rintlak bik kan siam angaia, digital media kan hmang anih pawhin midangte aia rintlak bik kan nih angai a ti a. Principle neiin fimkhur takin kal ila; kan hna hi ram leh mipuite rawng kan bawlna a ni tih i hre thar ang u a ti. PRO-in MJA-te a ngaihsakna leh thawhhona tha tak an neih avangin PRO leh a Staff te chungah lawmthu a sawi bawk.

Vawiina IPRO Staff Lunglei leh MJA Lunglei-ten kumthar inhlantharna hun an hmanah hian Pu H.Vanlallawma MJA member-in inhlantharna hun hmangin, kalkhawmte atangin thusawi hrang hrang ngaihthlak ni bawkin; thingpui ruai an kilho a ni.