LṬP-in Senior SDO, PWD Road division-I kàwmin, Lunglei khawpui chhung kawng siam mek leh ATL road chungchangte an sawipui
Ni 15.10.2024 (Thawhlehni) khan, Lunglei Ṭhalai Pawl chuan Senior SDO, PWD Road division-I, Pu Jonathan K.Thangmawizuala kàwmin, tunlaia Lunglei khawpui chhung kawng thawm ṭhat hna kal mêk leh ATL road chungchangte, Mizoram hmun danga NHIDCL hnuaia contractor-te leh Lunglei district-a NHIDCL hnuaia contractor-te hnathawh dan chungchangte an sawipui.
Pu Thangmawizuala hian Lunglei khaw chhung kawng bikah hian Diffect Liability Period hi 5th Feb, 2026 thleng anih thu leh chumi hun chhûng chuan kawngte hi anih dan tur ang taka siam anih leh nih loh uluk taka an vil tur thu a sawi. Lunglei khaw chhung kawngpui thawm ṭhat mêk hi, a tlo zawk theih nana ruahmanna an siamte, anih dan tur ang zela an kalpui tur thu leh an duh anga contractor-te’n an tih duh loh tlat erawh chuan, department lamin kut an sil hmak tur thu a sawi bawk.
Pu Thangmawizuala hian ATL road siamṭhat dan turah ngaihtuahna an sèn nasat thu leh ruahmanna hrang hrangte pawh an neih ṭan tawh thu sawiin, an beisei ang taka hma an la thei dawn anih chuan, Lunglei district chinah a bul aṭanga ṭan ṭhat vek an tum thu a sawi bawk.
NHIDCL leh a hnuaia contractor-te hnathawh danah, chhim lam kawngpui siamtute hna a muan bâkah ruahmanna a felfai lo deuh zâwk ni a a hriat thu sawiin, Champhai kawng an siam lai kha chuan engtik hunah pawh, thawktute koh theih an nih thu leh lirthei tè chi pawh an tàn ngai loh thu a sawi bawk a ni.
Lunglei Ṭhalai Pawl-in thuchhuah an siamah hian, tuna Lunglei khaw chhung kawng thawm ṭhat mek, a bikin AOC leh Chanmari inkar pothole hnawh dan hi a ṭha tâwk lo hle-in a hria a, Lunglei mipui zahlohnaah a ngai a, anih dan tur ang taka siam ṭha leh vek turin contractor hi a ngen a ni, tiin an tarlang.
Lunglei Ṭhalai Pawl chuan kan kawngpui pawimawhte enkawl tura Pathian ṭih mi, officer kan nei hi lawmawm a ti hle a, a lamah Lunglei Ṭhalai Pawl chu a ṭang tlat reng dawn a ni, an ti.
Dik taka hnathawh tum officer-te, transfer an tâwk ṭhin ni a ngaih theih thil a awm ṭhin chu Lunglei Ṭhalai Pawl chuan ngaihthiam har a ti a, hetiang thil hi thlen tir tawh lo turin sorkar leh department hotute a ngèn a, a thleng leh anih chuan Lunglei Ṭhalai Pawl chuan theihtâwpin a dodal dawn a ni, an ti bawk.
