22 Jan 2024: Lai Autonomous District Council a Chief Executive Member Pu V.Zirsanga chu eiruk thubuaiah Special Court (Prevention of Corruption) chuan kum 4 chhung lungin tang tur leh pawisa Rs Nuai 4 chawi turin a hrem.
Pu V.Zirsanga rual hian a kaihhnawiha inhnamhnawih midang 3 leh zirtirtu leh Non-Teaching Staff 30 te hremna nimin khan Court chuan a tichhuak a, Pu V.Zirsanga hian pawisa tih chingpen thubuaiah khatih laia LADC-a Executive Member niin Education a chan lai a ni a, pawisa tih chingpennaa a inhnamhnawih avang hian Court chuan kum 4 chhung lung in tar tur leh Rs Nuai 4 chawi turin a hrem a, pawisa chawi tur a neilo anih chuan kum 2 dang a tan belh dawn a ni.
Khatih hun laia Lawngtlai DEO Pu Lalduna Chinzah pawh a inhnamhnawih avangin kum 4 lungin tang turin leh Rs Nuai 6 chawi turin a hrem a, pawisa hi a pe theilo anih chuan kum 3 dang a tan belh dawn a ni.
He thil thlenga meizang hlaptu bera ngaih Pu NC Muankima, khatih hunlaia Thingkah Middle School Headmaster chu kum 5 chhung lungin tang tur leh Rs Nuai 6 chawi turin a hrem a, pawisa chawi turi hi a neilo anih chuan kum 3 dang a tan belh dawn a ni.
MSTA, Lawngtlai Secretary Pu C.Lalchawiliana pawh bawhchhiatna thurualpuitu anih avangin kum 4 chhung lungin tang tur leh Rs Nuai 4 chawi turin a hrem a, pawisa hi a pe theilo anih chuan kum 2 dang a tan belh dawn a ni.
Heng bakah hian zirtirtu leh thawktu dang mi 30-te chu an inhnamhnawihna nep deuh zawk a finfiah an nih angin lungin a an lo tan tawh tlak tawk a hrem an nih bakah Rs Nuai ruk theuh chawi tur leh an pawisa chawi tur hi an pe thei lo a nih chuan kum thum theuh lungin tana tlak turin Court chuan ro a rel bawk.
Court thuchhuah tarlan danin he thilah Rs 1,33,56,884/- tih chingpen a ni a, hetianga sawrkar hna-ah dan bawhchhia a duhsak zawng inthun thinna chuan zirna kalphung zawng zawng leh thang leh thar lo awm zel turte hmakhua a ti thim hle dawn a ti a, khawtlanga mi hnuaihnung leh duhsaktu nei ve lote’n an tuar ber thin tih sawiin, thu hnu dawn taka hremna chu pek a tul tih a sawi bawk a ni. (AIR)
